حکومت نیب کو سیاسی انتقام پورے کرنے کی غرض سے استعمال کر رہی ہے جبکہ خیبرپختونخوا میں اسی نیب کو تالے لگانا حکومت کی نیت آشکار کررہا ہے، میاں محمد حنیف
پیرس؍اسلام آباد(ایس ایم حسنین) پاکستان مسلم لیگ ن فرانس کے بانی وصدر میاں محمد حنیف نے وفاقی حکومت پر شدید تنقید کرتے ہوئے کہا ہے کہ بزدل حوکمت نے نیب کو اپنے سیاسی انتقام پورے کرنے کی غرض سے استعمال میں رکھا ہوا ہے وفاقی حکومت نے نیب کو اپنے سیاسی انتقام پورے کرنے اور اپوزیشن کو دھونس دکھانے کی خاطر استعمال میں رکھا ہوا ہے۔
انہوں نے کہا کہ ناعاقبت اندیش حکومت جان لے ماضی میں ایک آمر نے اس ادارے کو اپنے انتقامی مقاصد پورے کرنے کے لئے بنایا تھا آج اس آمر کے چیلے اسی مشق کو دہرانے میں مصروف ہیں مگر ہم ان سے کہتے ہیں کہ اس روش پر چلنے سے پہلے تاریخ کا مطالعہ کریں جعلی مقدمات دنیا کی تاریخ میں کبھی عوامی لیڈروں کو عوام سے دور نہیں رکھ سکے بلکہ عوامی لیڈروں کی مقبولیت کا باعث بنے۔
انہوں نے کہا کہ عمران نیازی کی حکومت نے ایک سال میں عوامی بھلائی سے متعلق کوئی کارکردگی نہیں دکھائی سوائے کشمیر کا سودا کرنے اور احتساب کے نام پر نیب کے ذریعے سیاسی مخالف جماعتوں کو دبانے کی کوشش کے لیکن یہ کوشش کبھی کامیاب نہیں ہوگی اورعظیم قائد میاں محمد نواز شریف عدالتوں سے سرخرو ہوکر عوام کے لئے پھر ڈٹ کر کھڑے ہونگے اور اصل جمہوریت بحال کرینگے۔
