لاہور: محکمہ موسمیات کی جانب سے ملک بھر کے مختلف حصوں میں آئندہ 5 روز کے دوران گرد آلود ہواؤں کے ساتھ بارش کی پیش گوئی کی گئی ہے۔ ذرائع موسمیات کے مطابق پیر اور منگل کو کراچی میں بھی تیز ہوائیں چلنے اور بارش کا امکان ہے۔ پنجاب کے شہر بہاولپور شہر اور گردونواح میں رات گئے گرج چمک کے ساتھ بارش کا سلسلہ شروع ہوا جس کے بعد موسم خوشگوار ہو گیا ہے۔ تاہم بارش شروع ہوتے ہی شہر کے مختلف علاقوں میں بجلی کی سپلائی معطل ہوگئی۔ موسم کی اس بدلتی صورتحال پر کاشتکاروں کا کہنا ہے کہ بارش کے باعث گندم کی تیار فصل کو نقصان پہنچنے کا خدشہ ہے۔ ایران سے بارش برسانے والے بادلوں کا ایک سسٹم بلوچستان میں داخل ہوگیا صوبے میں آج سے طوفانی بارشوں کا سلسلہ شروع ہونے کا امکان ہے جو آئندہ 2 روز تک جاری رہے گا۔ محکمہ موسمیات اور پی ڈی ایم اے نے بلوچستان میں آج سے شدید بارشوں کا سلسلہ شروع ہونے کی پیش گوئی کی ہے جو دو سے تین روز تک جاری رہ سکتا ہے۔ ذرائع موسمیات کے مطابق اس دوران شیرانی، ڑوب، موسیٰ خیل، قلعہ سیف اللہ، لورالائی، بارکھان، پشین، کوئٹہ، قلعہ عبداللہ، مستونگ، چاغی، سبی، زیارت، ہرنائی خضدار، نصیر آباد، خاران، تربت، آواران سمیت دیگر علاقوں میں آندھی کے ساتھ تیز بارش کا امکان ہے جبکہ بارش سے ندی نالوں میں طغیانی کا بھی امکان ہے۔ دوسری جانب پی ڈی ایم اے نے آئندہ ہفتے تیز بارشوں کے امکان کا الرٹ جاری کرتے ہوئے تمام اضلاع کے ڈپٹی کمشنروں کو لیٹر لکھا ہے جس میں تمام پکنک پوائنٹس پر جانے پر پابندی کیلئے دفعہ 144 نافذ کی ہدایت کی گئی ہے۔ گوادر کی ضلعی انتظامیہ نے شدید طوفانی بارشوں کے پیش نظر تمام ماہی گیروں کو آج رات اور کل سمندر میں جانے سے اجتناب کی ہدایت کی ہے۔
آئندہ 5 روز کے دوران گرد آلود ہواؤں کے ساتھ بارش کی پیش گوئی
