قومی ویمنز کرکٹ ٹیم کی کپتان بسمہ معروف شادی کے بندھن میں بندھ گئیں۔ کپتان کی مہندی کی تقریب گزشتہ روز لاہور میں منعقد کی گئی جس میں ساتھی کرکٹرز اور انکے اہل خانہ نے بھی شرکت کی۔اطلاعات کے مطابق بسمہ معروف آج شب انجینئر ابرار کے ساتھ نکاح کے بندھن میں بندھ گئیں۔
بسمہ معروف کے ہونے والے شوہر سافٹ ویئر انجیئنر ہیں۔گزشتہ روز ہونے والی مہندی کی تقریب میں ساتھی کھلاڑیوں اور عزیز و اقارب نے شرکت کی اور انہوں نے خوب ہلا گلا بھی کیا، تقریب کی تصاویر سوشل میڈیا پر وائرل ہوگئیں۔واضح رہے کہ 5 جون 2016 کو بسمہ معروف کو پاکستان ویمن ٹی ٹوئنٹی کرکٹ ٹیم کا کپتان مقررکیا گیا تھا، بعد ازاں انہیں 30 ستمبر کو پی سی بی نے ایک بار پھر ٹیم کی قیادت سونپی تھی۔بسمہ معروف 98 ایک روزہ اور 92 ٹی ٹوئنٹی میچز میں پاکستان کی نمائندگی کرچکی ہیں، ویسٹ انڈیز میں ہونے والے ورلڈ ٹی ٹوئنٹی میں حصہ لینے کے بعد سابق کپتان حال ہی میں وطن پہنچیں۔یاد رہے کہ رواں سال بسمہ معروف انجری کا شکار ہوگئیں تھیں جس کے بعد اُن کا کیریئر خطرات سے دوچار ہوگیا تھا تاہم کامیاب آپریشن کے بعد انہوں نے جرات مندی کا مظاہرہ کیا اور سخت ٹریننگ کے بعد وہ ایک بار پھر ایکشن میں نظر آئیں۔
