ممبئی (یس ڈیسک) بالی ووڈ کو میں ہوں ناں اور ہیپی نیو ایئر جیسی بلاک بسٹر فلمیں دینے والی ہدایتکارہ فرح خان نے انڈسٹری کے تینوں خانوں ( شاہ رخ، سلمان اور عامر) کو ایک ساتھ فلم میں سائن کرنا مشکل کام قرار دے دیا۔ کوریو گرافری سے فلمسازی کی طرف سفر کرنے والی 50 سالہ فرح خان نے اب میزبانی کے شعبے میں بھی قدم رکھ دیا ہے اور \’فرح کی دعوت\’ کے نام سے ان کا ایک کوکنگ شو ہندوستان میں مقبول ہورہا ہے۔
فرح خان سے اکثر یہ فرمائش کی جاتی ہے کہ شاہ رخ، سلمان اور عامر کو ایک ساتھ کسی فلم میں کاسٹ کریں تاہم فرح نے اس کام کو نہایت مشکل قرار دیتے ہوئے کہا ہے کہ اگرچہ وہ شاہ رخ، سلمان اور عامر کی بہت اچھی دوست ہیں، تاہم وہ انھیں ایک ساتھ کسی فلم میں کاسٹ کرنے کا وعدہ نہیں کرسکتیں۔
فرح کہتی ہیں کہ لگتا ہے کہ خدا بھی انھیں اکٹھا نہیں کرنا چاہتا لہذا میں بھی اس کی حامی نہیں بھر سکتی۔ ان کا مزید کہنا تھا کہ انھوں نے 8 سال پہلے تنیوں خانز کو فلم \’اوم شانتی اوم\’ کے ایک گانے کے لیے اکٹھا کرنے کی کوشش کی تھی تاہم وہ بھی ممکن نہ ہوسکا۔ شاہ رخ اور دپیکا پڈوکون پر فلمائے گئے اس گانے میں بالی ووڈ کی 30 شخصیات نے حصہ لیا تھا، جن میں سلمان خان بھی شامل تھے تاہم عامر خان اس موقع پر بھی دستیاب نہ ہوسکے تھے ۔فرح خان کہتی ہیں کہ ہو سکتا ہے
مستقبل قریب میں یہ ممکن ہو جائے، اس کے لئے وہ پوری امید رکھتی ہیں۔ یاد رہے کہ عامر خان اور سلمان خان ایک دوسرے کے بہت اچھے دوست ہیں لیکن ان دونوں کی شاہ رخ خان سے بالکل بھی نہیں بنتی اور اس کا اظہار یہ تینوں شخصیات مختلف مواقع پر کرتی رہتی ہیں ۔
