پیرس، بھارت کے مقبوضہ کشمیر پرغاصبانہ قبضے کیخلاف ایفل ٹاور پرشام 04 بجے مظاہرے میں کشمیری کمیونٹی کاہرفرد مذہبی، سیاسی اورسماجی وابستگی سے بالا تر ہوکر شرکت کرے، عابد ملک
پیرس؍اسلام آباد(ایس ایم حسنین)تحریک انصاف فرانس کے نامزد صدر عابد ملک نے پاکستانی وکشمیری کمیونٹی پر زور دیا ہے کہ مقبوضہ کشمیر میں جدوجہد آزادی منطقی انجام کے قریب پہنچ چکی ہے۔ انہوں نے کمیونٹی سے اپیل کی کہ پاکستانی وکشمیری کمیونٹی کا ہرفرد مذہبی ، سیاسی وسماجی وابستگیوں سے بالا تر ہوکر 27 اکتوبر بروز اتوار شام 04 بجے بھارت کیخلاف مظاہرے میں بھرپورشرکت کو یقینی بنائے۔
انہوں نے اپنے تمام عزیزوں ، دوستوں اورسیاسی وسماجی راہنمائوں سے درمندانہ اپیل کرتے ہوئے کہا ہے کہ 27 اکتوبرکو بھرپور اتحاد کا پیغام دینے کیلئے ہرفرد اپنا کردار ادا کرے۔ یہ فیصلہ کن دن ہے جب پوری دنیا کو بتایا جائیگا کہ بھارت نے کشمیر پرتمام علامی قوانین اور ضابطوں کو نظرانداز کرتے ہوئے مقبوضہ کشمیر پرغاصبانہ قبضہ کیا تب سے آج تک 70سال سے کرفیو، خواتین کی عصمت دری، بچوں ، جوانوں کا بے دردی کیساتھ قتل، کشمیریوں کی املاک کا نقصان انھیں شناخت پریڈ کے بہانے حبس بے جا میں رکھنا اور تمام ظلم وستم روا رکھے گئے جو کسی بھی طرح مہذب دنیا میں قابل قبول نہیں ہیں۔
اس لئے ایفل ٹاور پر 27 اکتوبر شام 04 بجے مظاہرے میں پاکستانی وکشمیری کمیونٹی کا ہرفرد ذاتی طور پر بھرپور شرکت کرے اور اپنے دوستوں اورعزیزوں کو بھی مظاہرے میں بھرپورشرکت کرنے پرآمادہ کرے تاکہ دنیا ئے عالم کو مقبوضہ کشمیر کے مظلوموں کی حمایت کا بھرپور پیغام دیا جاسکے۔
ایفل ٹاور پربروزاتوار 27 اکتوبر شام 04 بجے بھارت کے خلاف پرزور احتجاج میں پاکستانی وکشمیری کمیونٹی مثالی اتحاد کا ثبوت دیگی اور اتحاد کو نقصان پہنچانے والی تمام کوششوں کی نفی کی جائیگی۔
