بھارتی صدر جو تینوں مسلح افواج کا سپریم کمانڈر بھی ہے، ان کی ماہانہ تنخواہ ایک اعلیٰ بیوروکریٹ کی تنخواہ سے بھی کم ہے یہاں تک کہ اس کی تنخواہ مسلح افواج کے سربراہوں کی تنخواہ سے بھی کم ہے،صدر کے ساتھ نائب صدر اور گورنروں کی تنخواہیں بھی کابینہ کے سیکریٹری کی تنخواہ کے مقابلے میں کم ہیں۔
بھارتی صدر کی ماہانہ تنخواہ ڈیڑھ لاکھ روپے( پاکستانی دو لاکھ43ہزار روپے سے زائد) جب کہ سیکریٹری کی تنخواہ ڈھائی لاکھ روپے ہے۔جب کہ پاکستانی صدر کی تنخواہ بھارتی صدر کے مقابلے میں تقریباً نصف ہے۔بھارتی میڈیا کے مطابق بھارت کے صدر اور نائب صدر کی تنخواہ ملک کے اعلیٰ بیوروکریٹ اورمسلح افواج کے تینوں سربراہوں کے مقابلے میں کم ہے۔ صدر کی ماہانہ تنخواہ ایک لاکھ پچاس ہزار، نائب صدر کی ایک لاکھ 25 ہزارروپے اور ریاستی گورنروں کی ایک لاکھ دس ہزار روپے ہے۔
بھارت میں یکم جنوری 2016 سے 7 ویں پے کمیشن ایوارڈز پر عمل درآمد کے بعد کابینہ کا سیکریٹری جو بھارت میں سب سے اعلیٰ سطحی بیوروکریٹ شمار کیا جاتا ہے اس کی ماہانہ تنخواہ دو لاکھ پچاس ہزار روپے ہے جب کہ مرکزی حکومت کے سیکریٹری کی ماہانہ تنخواہ دو لاکھ پچیس ہزار روپے ہے۔ بھارتی صدر تین مسلح افواج یعنی فوج، ایئر فورس اور بحریہ کا سپریم کمانڈر ہے، تاہم صدر کی موجودہ تنخواہ تینوں مسلح افواج کے سربراہان سے بھی کم ہے، مسلح افواج کے سربراہان کابینہ کے سیکرٹری کے برابر تنخواہ ا لیتے ہیں۔
وزارت داخلہ کے ایک اہلکار نے نام نہ بتانے کی شرط پر بتایا کہ صدر،نائب صدر اور ریاستی گورنروں کی تنخواہوں میں اضافے کی سفارشات یونین کی وزارت داخلہ نے تیار کی تھی اور ایک سال قبل مرکزی کابینہ کی منظوری کے لئے کابینہ سیکرٹریٹ کو بھیجی گئی تھیں۔ سفارشات کے مطابق صدر کی تنخواہ 5 لاکھ ، نائب صدر کی تنخواہ ساڑھے تین لاکھ روپے اور گورنر کی 3 لاکھ روپے ماہانہ رکھی گئی۔تاہم ان سفارشات پر ایک سال بعد بھی کوئی فیصلہ نہیں کیا گیا۔حکومتی ترجمان نے اس حوالے سے کوئی تبصرہ نہیںکیا۔
صدر، نائب صدر اور گورنروں کی موجودہ تنخواہوں میں 2008 میںاضافہ کیا گیا،2008تک صدر کی تنخواہ پچاس ہزار،نائب صدر کی چالیس ہزار اور گورنر کی 36ہزار روپے ماہانہ تھی۔ میڈیا رپورٹ کے مطابق پاکستانی صدر سید ممنون حسین کی رواں مالی سال میںتنخواہ ایک لاکھ تیس ہزار روپے ماہانہ ہے جب کہ گزشتہ برس اسی ہزار روپے ماہانہ تھی۔ امریکی صدر ڈونلڈ ٹرمپ کی ماہانہ تنخواہ 35لاکھ روپے سے زائد ہے۔چینی صدر کی ماہانہ تنخواہ ایک لاکھ اسی ہزار روپے،روسی صدر کی ماہانہ تنخواہ تیر ہ لاکھ 32ہزار روپے،ترکی کے صدر کی ماہانہ تنخواہ13لاکھ66ہزار روپے،برطانوی وزیر اعظم کی سترہ لاکھ چالیس ہزار روپے،جرمنی کی چانسلر کی تنخواہ 23لاکھ پانچ ہزار روپے ہے جب کہ اقتدار سے بے دخل کےجانے والے زمبابوے کے صدر کی تنخواہ19لاکھ63ہزار روپے تھی۔
