سکھر بیراج سے نکلنے والی کیر تھر کینال میں ریسکیو آپریشن کرکے نایاب نسل کی 2؍ بلائنڈ ڈولفن کو بچا لیا گیا۔
ریسکیو آپریشن کے دوران سکھر بیراج سے کیرتھر کینال میں پانی کی سطح کو کم کیا گیا ، دونوں بلائنڈ ڈولفن مادہ ہیں اور ان کی لمبائی 7فٹ اور وزن 100کلو سے زیادہ ہے۔ آپریشن سے قبل کیر تھر کینال میں جال لگایا اور کشتیوں کے ذریعے ریسکیو آپریشن شروع کیا گیا ، اس دوران بیراج سے گزرنے والی ٹریفک اور لوگ بڑی تعداد میں کینال کے ارد گرد جمع ہوگئے جنہوں نے ریسکیو آپریشن دیکھا۔ ڈولفن ریسکیو سینٹر کے عملے نے دونوں بلائنڈ ڈولفن کو مرحلہ وار دریائے سندھ میں سکھر بیراج کے مقام پر چھوڑ دیا۔ انچارج ریسکیو سینٹر سکھر میر اختر تالپور کے مطابق دریا میں پانی کی سطح کم ہونے پر جب دریا اور کینالوں کا پانی ایک سطح پر آجاتا ہے تو اس وقت یہ بلائنڈ ڈولفن خوراک کی تلاش میں کینالوں کی طرف چلی جاتی ہیں۔
