نئی دہلی: بھارت کی ہندو انتہا پسند تنظیم آر ایس ایس کے سربراہ موہن بھگوت نے کہا ہے کہ ان کی تنظیم تاریخی بابری مسجد کے متعلق سپریم کورٹ کے فیصلے کو تسلیم کرے گی۔
بھارتی ذرائع ابلاغ کے مطابق نئی دہلی میں متعین غیرملکی سفارت کاروں کے50رکنی گروپ سے گفتگو کرتے ہوئے انھوں نے کہاکہ آر ایس ایس اور بھارت کی حکمراں بھارتیہ جنتا پارٹی 2الگ الگ تنظیمیں ہیں تاہم دونوں مختلف معاملات پر ایک دوسرے سے مشاورت کرتی ہیں۔ انڈیا فائونڈیشن کے زیر اہتمام تقریب آر ایس ایس کے سربراہ موہن بھگوت سے سفارتی نمائندوں کی ملاقات کیلیے منعقدکی گئی تھی۔ جس میں بھارت کے شہری ہوا بازی کے وزیر جیانت سنہا نے بھی شرکت کی۔ اس سوال کے جواب کہ آیا بابری مسجد تنازع کا سپریم کورٹ کا فیصلہ آئندہ انتخابات سے قبل آسکتا ہے، موہن بھگوت نے کہا کہ عدالت اس بارے میں ایک رولنگ دے گی اور آر ایس ایس اس پر عمل کرے گی۔
