وزیر اعلیٰ پنجاب شہبازشریف نے کہا ہے کہ عمران خان تمام تر کوششوں کے باوجود چور دروازے سے اقتدار حاصل نہیں کرسکتے، ان کی تمام تر توقعات کا دارو مدار جے آئی ٹی رپورٹ کی دستاویز پر مبنی ہے جو تضادات کا شکار ہے۔
لاہور سے جاری ایک بیان میں وزیر اعلیٰ شہبازشریف نے کہا ہے کہ مشرف دور سے آج تک عمران خان نے ہمیشہ سیاست میں مصنوعی سہارے ڈھونڈنے کی کوشش کی ،کاش عمران خان ایسا کرنے کی بجائے جمہوری عمل پر بھروسہ کرتے ۔ ان کا کہنا تھا کہ قدرت نے عمران خان کو کے پی کے میں نادر موقع دیا تھا لیکن عوام کی خدمت ان لوگوں کے بس کا کام نہیں۔
انہوں نے کہا کہ عمران خان کی تمام تر توقعات کا دارومدار جے آئی ٹی رپورٹ کی دستاویز پرمبنی ہے مگر اس رپورٹ کے مندرجات تضادات کا شکار ہیں اور یہ رپورٹ منظر عام پر آنے سے پہلے متنازعہ ہوچکی ہے۔ شہبازشریف نے کہا کہ عمران خان نے میرے خلاف عدالت میں ریفرنس دائر کرنے کی دھمکی دی ہے اور میں عمران خان کے ریفرنس کا انتظار کروں گا ۔یقین ہے نیازی صاحب اس ریفرنس کے بعد عدالت کا سامنا کرنے کی بجائے حیلے بہانے تلاش کریں گے۔ شہبازشریف نے کہا کہ عمران خان کی میرے خلاف ہرزہ سرائی نئی بات نہیں ان کے خلاف دروغ گوئی پر دس ارب روپے کا ہرجانہ دائر کر رکھا ہے عمران خان نے 23 مارچ 2013 کو لاہور کے ایک جلسے میں جھوٹ نہ بولنے کا اعلان کیا تھا ان کی سیاست سے جھوٹ اور گالیاں نکال دیں توباقی کچھ نہیں بچے گا۔
