سعودی عرب میں نواز ٹرمپ ملاقات سے پاک امریکہ تعلقات میں بہتری آئے گی :پاکستانی سفیر کی واشنگٹن میں صوفی نائٹ کی تقریب میں گفتگو
واشنگٹن میں پاکستانی سفارتخانے میں صوفی نائٹ ہوئی جس میں دفتر خارجہ کی اہم شخصیات اور کثیر تعداد میں امریکیوں نے شرکت کی۔ پاکستانی سفیر اعزاز چوہدری کا اس موقع پر کہنا تھا کہ کلبھوشن ہو یا اور کوئی دہشت گرد، اسے قانون کے مطابق سزا ملے گی ، نواز ٹرمپ ملاقات پاک امریکہ تعلقات میں معاون ثابت ہوگی ۔ پاکستان اور امریکا کی دوستی کو 70 سال ہوگئے ، واشنگٹن میں اس حوالے سے پاکستانی سفارتخانے میں صوفی نائٹ کا انعقاد کیا گیا ، تقریب میں پاکستانی سفیر اعزاز چودھری ، دفتر خارجہ کی اہم شخصیات اور امریکی شہریوں کی بڑی تعداد نے شرکت کی ۔ استاد دلشاد نے خوبصورت دھنیں بکھیر کر سماں باندھ دیا۔
دنیا نیوز سے خصوصی گفتگو کرتے ہوئے پاکستانی سفیر اعزاز چودھری نے کہا امریکہ میں اولیاء کرام کا پیغام صوفی میوزک کے ذریعے دیا گیا ۔ کلبھوشن سے متعلق سوال پر اعزاز چودھری نے کہا کلبھوشن ہو یا اور کوئی دہشتگرد ، اسے قانون کے مطابق سزا ملے گی ۔ پاکستانی سفیر نے کہا سعودی عرب میں نواز ٹرمپ ملاقات پاک امریکہ تعلقات میں معاون ثابت ہو گی ۔ اعزاز چودھری نے کہا صدر ٹرمپ کا سعودی عرب کا دورہ مسلمان ممالک کے ساتھ امریکہ کے بہتر تعلقات کی نشاندہی کر رہا ہے ، امریکہ سے دفاعی معاہدہ سعودیہ نے اپنی دفاعی ضروریات کے تحت کیا۔
