وزیر اعظم نواز شریف نے گرمیوں میں بجلی لوڈشیڈنگ پر قابو پانے کیلئے وزیر اعلیٰ پنجاب کی جانب سے پیش کردہ موبائل پاور پلانٹس لگانے کی تجویز کا جائزہ لینے کی ہدایت کر دی ہے۔
وزیر اعلیٰ پنجاب نے 24 اپریل کو ہونے والے کابینہ کی توانائی کمیٹی کے اجلاس میں کہا تھا کہ بجلی کی طلب اور رسد کا فرق بہت زیادہ ہے، ہنگامی اقدامات کئے جائیں۔ جیو نیوز کے نمائندے سیف الرحمان کے مطابق 24 اپریل کو وزیر اعظم کی سربراہی میں ہونے والے کابینہ کی توانائی کمیٹی کے اجلاس میں وزیر اعلیٰ پنجاب نے وزارت پانی وبجلی کی جانب سے پیش کئے گئے شہری اور دیہی علاقوں میں لوڈشیڈنگ کے دورانئے کے اعدادوشمار سے اختلاف کیا تھا۔
وزارت پانی وبجلی نے کہا تھا کہ شہروں میں 6 جبکہ دیہی علاقوں 8 میں بارہ گھنٹے لوڈ شیڈنگ کی جارہی ہے۔ ذرائع کے مطابق وزیر اعلیٰ پنجاب کا کہنا تھا کہ لاہور سمیت پنجاب کے شہروں میں 10 سے بارہ گھنٹوں تک لوڈشیڈنگ ہوتی ہے۔
انہوں نے کہا کہ بجلی کے جاری منصوبوں کو مکمل ہونے میں ابھی کچھ وقت لگے گا،بجلی کی کمی پورا کرنے کے موبائل پاور پلانٹس کے آپشنز سمیت تمام وسائل بروئے کار لائے جائیں۔
