وزیر اعظم نواز شریف نے کہا ہے کہ نواز شریف تمہارے کہنے پر استعفیٰ دے گا،سیاست اور ملک چلانا تمہارا کام نہیں، تم صرف کرکٹ کھیل سکتے تھے اب تو کرکٹ بھی نہیں کھیل سکتے، جو کھیل لی وہ کھیل لی۔
اوکاڑہ میں مسلم لیگ ن کے جلسہ عام سے خطاب کرتے ہوئے وزیر اعظم میاں محمد نواز شریف کا کہنا تھا کہ 2013 والا منظر یاد آرہاہے،ابھی وہ منظر نہیں بھولاہوں کہ آپ نے 2017 میں نیا رکارڈ قائم کردیا، آپ کا جذبہ دیکھ کر دل بڑا خوش ہورہا ہے۔ ُآپ سے وعدہ کیا تھا موٹروے یہاں سے گزرے گی، مجھے یاد ہے ذرا ذرا تمہیں یاد ہو کہ نہ یاد ہو،آج وعدے کی توثیق کرنے آیا ہوں، موٹروے بنے گی، آپ کے وارے نیارے ہوجائیں گے۔وزیر اعظم نواز شریف نےاوکاڑہ میں سڑکوں کی تعمیر و مرمت کے لیے 20 کروڑ روپے ، اوکاڑہ اسپتال کو 200 بستروں سے بڑھاکر 500 بستروں کا اسپتال بنانے کے علاوہ اوکاڑہ میں انڈسٹریل اسٹیٹ بنانے کا بھی اعلان کیا۔
وزیر اعظم نواز شریف نے عمران خان کا نام لئے بغیر کہا انہیں جاکر بولو، جو آج کل چھوٹی چھوٹی جلسیاں کررہے ہیں،وہ یہاں آکر دیکھیں جلسہ کسے کہتے ہیں،یہ ہے پاکستان کے دل کا فیصلہ، اوکاڑہ پاکستان کا دل ہے،یہ جذبہ بتارہاہے دو ہزار اٹھارہ بھی مسلم لیگ ن کا ہوگا۔ وہ لوگ جو احتجاج کرتےہیں، لوڈشیڈنگ کے موجد آج لوڈشیڈنگ کی بات کررہے ہیں،2018 میں لوڈشیڈنگ کا ہمیشہ کے لیے خاتمہ کردیا جائے گا،ہر مہینے میں ایک نیا کارخانہ تیار ہورہا ہے،اب بجلی آئے گی اور کبھی نہیں جائے گی،ان لوگوں سے پوچھو پاکستان کو اندھیروں میں کیوں دھکیلا۔ انہوں نے کہا ملک تیزی سے ترقی کررہاہے، دہشت گردی ختم ہورہی ہے،کراچی کا امن واپس آرہاہے، بجلی صرف آئے گی نہیں بلکہ سستی بھی ہوگی،احتجاج کرنے والے احتجاج ہی کرتے رہ جائیں گے،ہم سڑکیں بناتے جائیں گے، یہ سڑکیں ناپتے جائیں گے۔
