ممبئی: بالی ووڈ میں ایک عرصے تک اداکارہ پریانکا اور اداکاراکشے کمار کے طوفانی عشق کے چرچے خوب تھے لیکن وقت بدلا تو سب ہی بدل گیا اور دونوں ہی اداکار اب ایک ساتھ کام نہیں کرتے ہیں جس کے حوالے سے اداکار کا کہنا تھا کہ وہ اب بھی پریانکا کے ساتھ کام کرنے کے خواہشمند ہیں۔
بھارتی میڈیا رپورٹس کے مطابق بالی ووڈ اداکار اکشے کمار کو بھارتی ٹی وی پروگرام میں مدعو کیا گیا جہاں ان کے کرئیر سمیت ان کے ذاتی زندگی کے حوالے سے سوالات کیے لیکن اداکار نے ہر سوال کا جواب ہی انتہائی مہارت سے دیا۔ اکشے کمارسے جب پوچھا گیا کہ اب وہ پریانکا چوپڑا کے ساتھ فلم میں کام کیوں نہیں کرتے ہیں تو ان کا کہنا تھا کہ ایسی کوئی بات نہیں ہے جس کے باعث میں پریانکا کے ساتھ کام نہیں کرتا، میں نے اداکارہ کے ساتھ 5 فلموں میں کام کیا ہے۔ اداکار نے کہا کہ سوائے رانی مکھرجی کے میں نے ہر اداکارہ کے ساتھ کام کیا ہے اور اگر پھر سے پریانکا کے ساتھ کام کرنے کا موقع ملتا ہے تو میں ضرور کروں گا اور اگر انہیں کوئی غلط فہمی ہے تو وہ بات کرکے ختم کرسکتی ہیں۔ فلم “ونس اپون اے ٹائم ان ممبئی” کی صحیح طرح سے پروموشن نہ کرنے پر فلم کی پروڈیوسرایکتا کپور اور اکشے کمار کے درمیان خاصی لفظی جنگ ہوئی تھی جب اس حوالے سے اداکار اکشے کمار سے پوچھا تو ان کا کہنا تھا کہ ان کا کسی کے ساتھ بھی جھگڑا نہیں ہے، نہ ہی انہیں مجھ سے کوئی بھی مسئلہ ہے جب کہ چاہے توایکتا کو اس پروگرام میں بلا کرسب کچھ پوچھا جاسکتا ہے۔ واضح رہے کہ اکشے کمارہدایتکار سبھاش کپورکی فلم ’’جولی ایل ایل بی 2‘‘ میں مرکزی کردارادا کرتے نظر آئیں گے جب کہ فلم 10 فروری کو نمائش کے لیے پیش کی جائے گی۔
