بالی وڈ کااس سال کا پہلا بڑا ”میچ“ زبردست رہا۔رئیس قابل نکلا اور قابل نے بھی رئیس کی طرح دھندہ کیا۔کنگ خان اور روشن ہیرو دونوں ایکشن کے امتحان میں پاس ہوگئے۔شاہ رخ اپنی”فین“ کے بعد مایوس تھے تو ریتھک روشن کو ”موہن جو دڑو“ لے کر ڈوب گئی تھی۔
ایک نقصان جو ان دونوں فلموں کے ”دنگل“ سے ہوا وہ عامر خان کو ہوا کیونکہ عامر کی فلم چار سو کروڑ کمانے والی پہلی بالی وڈ فلم نہیں بن سکی ۔عامر خان چار سو کروڑ سے تھوڑا پہلے رن آوٴٹ ہوگئے ۔لیکن دنیا بھر میں دنگل اب تک 740کروڑ کماچکی ہے۔
شاہ رخ کی رئیس جس میں لیلیٰ کی ”پہیلی“ بھی تھی اور نواز کے زورداربھاشن بھی، باکس آفس پر پہلے دن سے آگے رہی۔سنی لیونی کے آئٹم سانگ نے جو اب تک یو ٹیوب پر 10کروڑ بار دیکھا جاچکا ہے سنگل اسکرین پر سیٹیاں اور تالیاں سمیٹی۔
رئیس نے ریلیز کے چھٹے دن سو کروڑ کا چھکا لگالیا۔یعنی شاہ رخ اپنی پچھلی فلم ” فین“ کی طرح اس بار سو کروڑ سے پہلے سینما گھروں سے آوٴٹ نہیں ہوئے۔اور ابھی تو کروڑوں یہ گنتی جاری ہے دوستو!
رئیس میں ”بادشاہ“ کا غصہ ”شہنشاہ“ کو بھی خوب بھایا اور بگ بی نے دل کھول کر شاہ رخ کی تعریف کی ۔شاہ رخ کی فلم دنیا بھر میں پسند کی گئی اور اب تک فلم دنیا بھر سے 160کروڑ سے زیادہ کا بزنس کرچکی ہے۔
رئیس کی للکار کے سامنے قابل نے بھی ہار نہیں مانی،قابل کروڑوں کی دوڑ میں پیچھے ضرور رہا لیکن ابھی تک رئیس کو برابر کی ٹکر دے رہا ہے۔رئیس کے مقابلے میں کم اسکرین پر ریلیز ہوئی ”قابل“ نے اب تک چھ دنوں میں75کروڑ کمالیے ہیں۔ اس کا مطلب ہے کہ قابل کی سو کروڑ کی سنچری تو پکی ہے۔
روشن ہیرو کی پچھلی فلم ”موہن جو دڑو“باکس آفس پر بمشکل50کروڑ ہی کماسکی تھی۔دنیا بھر سے اس فلم کی کمائی سو کروڑ ہوچکی ہے۔قابل جو رئیس کا شاگرد بھی ہے فلم کی ریلیز کے وقت شاہ رخ کواپنے پیغام میں کہا کہ اس کے استاد اپنے شاگرد قابل پر فخر کریں گے۔قابل کا میوزک بھی رئیس کی طرح ہِٹ نہیں ہوا لیکن ریتھک روشن اور رونیت رائے کی ایکٹنگ نے کمال کردیا۔
ریتھک کے پاپا راکیش روشن کا ”کے “ فیکٹر ”کائیٹس“ میں تو نہیں چلا لیکن قابل ان کی ایک اور کامیاب فلم ثابت ہوئی، جس کا نام ”کے “ سے شروع ہوتا ہے۔قابل کا ایک اورچھکا اس وقت لگے گا جب وہ رئیس کو کروڑوں کی ڈبل سینچری بنانے سے روک دے گا۔اس وقت تو دونوں فلموں کا زوردار ٹاکرا چل رہا ہے ، یہ بھی ممکن ہے کہ اگلا” ویک اینڈ“قابل کے نام ہوں اور دونوں کے کروڑوں کا فاصلہ اور کم ہوجائے۔
فاصلہ تو ”کرن ارجن“ کے درمیان بھی کم ہوگیا ہے ۔دونوں خان اپنی مشہور لڑائی کے سالوں بعد پھر سے دوست تو بن چکے ، ٹی وی شوز اور ایوارڈ شوز میں ایک ساتھ نظر بھی آئے ،لیکن اب ایک بار پھر دونوں بڑی اسکرین پر نظر آئیں گے۔شاہ رخ خان عید پر سلمان خان کی فلم ”ٹیوب لائٹ“ میں مہمان اداکار کے طور پر سینما گھروں کو روشن کریں گے۔
رئیس میں ماہرہ خان کی کنگ خان کے ساتھ کیمسٹری بھی خوب جمی۔ماہرہ کی بہترین نئی اداکارہ کے ایوارڈ کیلئے نامزدگی پکی ہوگئی ہے ۔ایک اور پاکستانی اداکارہ اور ٹیلنٹ پاور ہاوٴس صبا قمر بھی ”ہندی میڈیم“سے اپنے بالی وڈ کیریئر کا آغاز کریں گی اور یہ فلم مارچ میں ریلیز ہوگی ۔
ماہرہ خان کی طرح صبا کی جوڑی بھی بالی وڈ کے خان کے ساتھ بنی ہے لیکن اس خان کا نام ہے عرفان خان۔ اب صبا فلم کی پروموشن کیلئے بالی وڈ جائیں گی یا انتہا پسندانھیں بھی ماہرہ کی طرح روکنے میں کامیاب ہوجائیں گے یہ تو وقت بتائے گا۔
ابھی تو ان انتہا پسندوں نے نشانہ بنایا ہے سنجے لیلیٰ بھنسالی کو۔جی ہاں سنجے لیلیٰ بھنسالی جو خاموشی،ہم دل دے چکے صنم،دیوداس، بلیک ، رام لیلیٰ اور باجی راوٴ مستانی جیسی فلمیں بناچکے ہیں۔سنجے کو رام لیلیٰ اور باجی راوٴ مستانی جیسی فلمیں بناتے ہوئے بھی انتہا پسندوں کے احتجاج کا سامنا کرنا پڑاتھا لیکن”پدما وتی“ فلم بنانے کے دوران غنڈوں کے ہاتھ سنجے کے گریبان تک پہنچ گئے اور ان کا مارا پیٹا گیا۔پدما وتی میں دپیکا اور رنویر سنگھ کے ساتھ شاہد کپور نظر آئیں گے۔
دپیکا کا ہالی وڈ کیریئر کا آغاز بھی ہوگیا،ون ڈیزل کے ساتھ ان کی فلم نے دنیا بھر سے دس ارب روپے سے زائد کمالیے اور ابھی بھی گنتی جاری ہے۔دپیکا کی سہیلی پریانکا کی بھی ہالی وڈ مووی ریلیز کیلئے تیار ہے لیکن ابھی ریلیز کیلئے تھوڑا سے انتظار ہے۔
پریانکا کے ساتھ ”بے واچ“ میں ”دی راک“ ڈیوائن جانسن نظر آئیں گے ۔راک نے پچھلے سال کمائی میں سب ہالی وڈ اسٹارز کو مات دی تھی۔
مات تو اکشے کمار کو بھی دینی ہوگی ارشد وارثی کی پرفارمنس کو جن کی جگہ وہ ”جولی ایل ایل بی ٹو“ میں کام کر رہے ہیں۔فلم اگلے مہینے ریلیز ہوگی ۔
اکشے کے پاس صرف ایک ہفتہ ہوگا باکس آفس سے کروڑوں سمیٹنے کا کیونکہ اُس سے اگلے ہفتے ارشد وارثی کا ”ارادہ“ہے۔ اکشے کمار کا بزنس روکنے کا، وہ بھی اپنی”عشقیہ“ کی جوڑی دار نصیر الدین شاہ کے ساتھ۔دیکھتے ہیں باکس آفس پر کیا ہوگا۔
