وزیراعلیٰ بلوچستان نے کہا ہے کہ پر امن بلوچستان کا قیام اور عوام کے جان و مال کا تحفظ ہماری اولین ذمہ داری ہے۔ دہشت گردی کے سنگین چیلنج سے نمٹنے کے لیے حکومت پختہ عزم رکھتی ہے۔
وزیراعلیٰ بلوچستان نواب ثناء اللہ خان زہری نے پولیس، ایف سی اور قانون نافذ کرنے والے دیگر اداروں کی جانب سے کوئٹہ اور دیگر علاقوں میں دہشت گردوں کے خلاف جاری کامیاب کاروائیوں پر اطمینان کا اظہار کیا ہے۔
انہوں نے کہا کہ دہشت گردوں اور ان کے سہولت کاروں کا آخری حد تک پیچھا کر کے انہیں کیفر کردار تک پہنچانے میں کوئی کسر اٹھا نہیں رکھی جائیگی۔
وزیراعلیٰ نے پولیس اور قانون نافذ کرنے والے دیگر اداروں کو صوبہ بھر بالخصوص کوئٹہ شہر میں حفاظتی اقدامات کو مزید موثر بنانے کی ہدایت بھی کی ہے۔
خاص طور سے شہر کے حساس اور عوامی مقامات پر حفاظتی انتظامات میں اضافے، شہر کے داخلی اور خارجی راستوں پر نگرانی کے عمل کو مزید سخت کرنے، سیکورٹی فورسز کے گشت میں اضافے، متعلقہ کنٹرول رومز کو فعال رکھنے اور سیکورٹی اداروں کے مابین مربوط روابط کے قیام کی ہدایت بھی کی ہے۔
