شیخوپورہ(بیورورپورٹ)شہر اور اس کے گردونواح میں ڈکیتی ، راہزنی اور چوری کی کئی وارداتیں ہوئیں،سرحدی گاؤں جنڈیالہ کلساں میں تین ڈاکو لاہور پولیس کے ملازم محمد نواز کے گھر میں داخل ہو کر اہلخانہ کو یرغمال بنا کر لاکھوں روپے مالیت کے زیورات اور دیگر سامان لوٹ کر فرار ہوگئے، تھانہ فیکٹری ایریا کے علاقہ کھتری والہ میں واقع ایک پولٹری فارم کے قریب دو مسلح ڈاکوؤں نے محمد عدنان سے ہزارو ں روپے نقدی اور موبائل فون چھین لیا، تھانہ سٹی بی ڈویژن کے علاقہ چھتری چوک کے قریب دو مسلح ڈاکوؤں نے خاتون روبینہ بی بی سے پرس چھین لیا جس میں نقدی اور موبائل فون تھا، اسی تھانہ کے علاقہ قادر آباد میں چوروں کا گروہ شہری محمد فیاض کی موٹر سائیکل چوری کرکے لے گیا، تھانہ اے ڈویژن کے علاقہ شرقپور روڈ کی گلی نمبر 3میں تین ڈاکوؤں نے محمد آصف کے گھر داخل ہو کر کمسن بچوں کو اسلحہ کی نوک پر یرغمال بنانے کے بعد گھر سے طلائی زیورات، نقدی اور دیگر قیمتی سامان لوٹ لیا، اسی تھانہ کے علاقہ سول کوارٹر روڈ پر دو ڈاکوؤں نے تاجر جاوید سے 38ہزار روپے نقدی، موبائل فون اور صلاح الدین روڈ پر دو ملزمان نے خرم شہزاد سے نقدی اور موبائل فون چھین لیا، تھانہ فیروزوالہ کے علاقہ کرول گاؤں کالوکے میں تین مسلح ڈاکوؤں نے محمد عمران سے گن پوائنٹ پر موٹر سائیکل ، نقدی اور موبائل فون چھین لیا،جیون پورہ میں تین افراد مقامی شہری مجاہد شاہ کے گھر سے زیورات سمیت لاکھوں روپے مالیت کا سامان نکال کر لے گئے ملزمان اس کے گھر میں مہمانوں کے روپ میں آئے اور مٹھائی میں نشہ آور شے کھلا کر تمام اہلخانہ کو بے ہوش کردیا، فیض پور میں پراپرٹی ڈیلر میاں خورشید کے دفتر سے 18لاکھ روپے چوری ہوگئے، الرحمن گارڈ ن میں چوروں کا گروہ تاجر اورنگزیب کی دکان سے ہزاروں روپے مالیت کا سامان نکال کر لے گیا، فیصل آباد روڈ پر فیروزوٹواں کے قریب دو ڈاکو نوجوان رانا طیب سے 53سو روپے اور دیگر اشیاء چھین کر فرار ہوگئے، گاؤں نواں کوٹ میں چوروں کا گروہ امداد حسین کے گھر کا صفایا کرگیا،لاہور روڈ کی آبادی آصف کالونی میں چھ ڈاکو محمد اقبال کے گھر سے 6تولے زیورات سمیت لاکھوں روپے مالیت کا سامان لوٹ کر فرار ہوگئے، محلہ بستی بلوچاں میں شاہدرہ سے مہمان آئے ہوئے محنت کش یوسف کی موٹر سائیکل نامعلوم چور لے اڑے،برج اٹاری میں محنت کش محمد اسلم کی واٹر ٹربین چوری ہوگئی، اڈہ مانانوالہ میں ایک ورکشاپ سے محنت کش امین مسیح کی پک اپ گاڑی چوری ہوگئی، پولیس مصروف تفتیش ہے۔
