شیخوپورہ(بیورورپورٹ)شہر اور اس کے نواحی علاقوں میں ڈکیتی اور چوری کی کئی وارداتیں ہوئیں ، لاہور روڈ پر منڈیالی کے نزدیک ناکہ لگا کر کھڑے ڈاکوؤں کے گروہ نے کار نہ روکنے پر فائرنگ کرکے اس میں سوار ایک شخص فہیم شہزاد کو شدید مضروب کردیا اور فرار ہوگئے وہ اپنی فیملی کے ہمراہ لاہور سے شیخوپورہ آرہا تھا،گھنگ روڈ پر اسٹیڈیم پارک کے نزدیک دو ڈاکو نوجوان شریف سے دو لاکھ 71ہزار روپے چھین کر فرار ہوگئے وہ بنک سے یہ رقم لیکر گھر جارہا تھا، گاؤں خاکی کے نزدیک تین ڈاکو محنت کش عارف علی سے موٹر سائیکل اور موبائل فون چھین کر فرار ہوگئے، طارق روڈ پر منیر سٹریٹ کے قریب دو ڈاکو نوجوان شاہد سے 10ہزار روپے اور موبائل فون چھین کر فرار ہوگئے، تھانہ سٹی بی ڈویژن کے عقب میں واقع علاقہ رحمان روڈ میں نقب زنوں کا گروہ مقامی شہری لطیف احمد کی ہمشیرہ کے مکان کے تالے توڑ کر وہاں سے لاکھوں روپے مالیت کے زیورات اور کرنسی نوٹ نکال کر لے گئے، اسی طرح گلی نمبر 3گھنگ روڈ میں مقامی شہری عمران علی کے گھر سے بھی نقب زنوں کا گروہ 10تولے زیورات اور اڑھائی لاکھ روپے نکال کر لے گیا، تھانہ سٹی بی ڈویژن کے علاقہ گوپال سنگھ کی رہائشی معمرِ خاتون حلیمہ بی بی کو اس وقت کار سوار ملزمان اغواء کرکے طلائی چوڑیاں اور بالیاں چھین کر بند روڈ پر پھینک کے فرار ہوگئے جب وہ گھر سے کسی کام کیلئے نکلی تھی، پولیس نے خاتون کے پوتے وقار یونس کی رپورٹ پر مقدمہ درج کرلیا ہے ، تھانہ سٹی بی ڈویژن کے علاقہ جنڈیالہ روڈ پر نامعلوم چور غلام مصطفی کی موٹر سائیکل لے اڑے،جی ٹی روڈ کے علاقہ پرانا داؤکے کے رہائشی نامعلوم چور محمد زکریا کے گھر کے تالے کاٹ کر قیمتی سامان اور نقدی چوری کرکے فرار ہوگئے، پولیس مصروف تفتیش ہے۔
