کراچی …….کراچی میں قومی اسمبلی کے حلقہ این اے 245 میں انتخابی گہما گہمی کا آغاز ہوگیاجہاں7 اپریل کو ہونے والے ضمنی انتخاب میں 4 لاکھ سے زائد ووٹرز کے لیے الیکشن کمیشن 227 پولنگ اسٹیشنز قائم کرے گا،سیاسی جماعتوں نے بھی انتخابی دفاتر کے دروازے کھول دئیے۔
کراچی میں انتخابات کا موسم پھر پلٹ آیا اس بار معرکہ قومی اسمبلی کے حلقہ این اے 245 کا ہے جونیو کراچی، نارتھ ناظم آباد اور ناظم آباد کے علاقوں پر محیط ہے۔ حلقے میں 4 لاکھ9 ہزار 655 ووٹرز7 اپریل کو اپنا حق رائے دہی استعمال کریں گے۔
ڈسٹرکٹ الیکشن کمشنر ندیم حیدر نے جیو نیوز کو بتایا کہ انتخابات کے موقع پر 227 پولنگ اسٹیشنز بنائے جائیں گے اور جلد سیکیورٹی پلان بھی تیار کرلیا جائے گا۔انتظامیہ کے ساتھ ساتھ سیاسی جماعتوں نے بھی تیاریاں شروع کردی ہیں۔این اے 245 کی دفاعی چیمپین ایم کیوایم نے حلقے میں انتخابی دفاتر کھول دئیے ہیں۔متحدہ کے امیدوار کمال ملک کہتے ہیں ضمنی انتخابات میں کم ٹرن آئوٹ کی روایت توڑ دیں گے راہ میں رکاوٹیں کھڑی کی گئیں تو تحفظات الیکشن کمیشن تک پہنچائیں گے۔این اے 245 میں 10 آزاد امیدواروں سمیت 16 امیدوار مدمقابل ہونگے،ایم کیوایم کے علاوہ پیپلزپارٹی،پی ٹی آئی اور پاسبان کے امیدوار بھی انتخاب لڑیں گے۔
