کراچی…پی آئی اے ملازمین کی ہڑتال جاری ہے جبکہ انتظامیہ نےاندرون اور بیرون ملک 3 جہاز اڑادیے، ڈائریکٹر اور جنرل منیجرلیول کے پائلٹوں نے آج پروازیں آپریٹ کیں ۔
پی آئی اے کی انتظامیہ نے فلائٹ آپریشن کی جزوی بحالی کا دعویٰ کیا ہے،5 دن سے پریشان مسافروں نے سکھ کا سانس لیا، سعودی عرب سے عمرہ زائرین کو لے کر 2 پروازیں راول پنڈی پہنچ گئیںجبکہ لاہور ایئر پورٹ سے آج شام فلائٹ آپریشن کی بحالی کا امکان ہے۔دو پروازیں جدہ جاکر مسافروں کولے آئیں اور ہڑتالی دیکھتے رہ گئے ۔پاکستان آنے پر جدہ میں پھنسے 700 عمرہ زائرین نے سکھ کا سانس لیا ،مگر اب بھی تقریباً 3 ہزار افراد وطن واپسی کی راہ تک رہےہیں ، راولپنڈی کے سوا دیگر شہروں میں فلائٹ آپریشن چھٹے روز بھی مکمل بند ہے ۔لاہورمیں پی آئی اے فلائٹ آپریشن کی معطلی پانچویں روزبھی جاری ہے، رن وے پر کھڑے پی آئی اے کے طیاروں پر دھول چڑھ گئی،انٹری پاسز منسوخ ہونے کی وجہ سے پی آئی اے ملازمین کو ائر پورٹ کی حدود میں داخل ہونے سے بھی روک دیا گیا ، پریشان حال مسافر پی آئی اے سروس کو کوستے رہے۔ادھر پی آئی اے جوائنٹ ایکشن کمیٹی کی مختلف شہروں میں ہڑتال جاری ہے،راولپنڈی میں ایئرپورٹ کے مرکزی دروازے سے پولیس نے دھرنا ملازمین کا سامان اٹھادیا جبکہ لاہور میں پی آئی اے ملازمین کے ساتھ ان کے اہل خانہ بھی مظاہرے میں شریک ہیں۔ کراچی میں رینجرز کی تحقیقاتی ٹیم کافائرنگ کی جگہ کادورہ کرکے شواہد اکٹھے کیے ہیں۔
