جدید دور میں پہلی بار شائقین کو نئے انداز کا میوزک فلم میں سنائی دیگا،اداکار کی ٹیلیفونک گفتگو
کراچی (سٹاف رپورٹر) اداکار ، ہدایتکار اور رائٹر شان شاہد نے زیر تکمیل فلم ارتھ ٹو کے دوسرے سپیل کا کام مکمل کرلیا ۔ مذکورہ سپیل میں اداکارہ حمائمہ ملک ، عظمیٰ علی خان، شان شاہد اور محب مرزا کا کام گزشتہ تین روزسے جاری تھا جس میں گیتوں کے علاوہ ڈرامائی مناظر بھی فلمائے گئے ، اداکار و ہدایتکار شان نے نمائندہ دنیا سے ٹیلی فونک گفتگو کرتے ہوئے بتا یا کہ اس فلم میں کہانی کے ساتھ میوزک پربھی خصوصی توجہ دی گئی ہے ۔ جدید دور میں پہلی بار شائقین کو نئے انداز کا میوزک فلم میں سنائی دے گا۔ سر و تال کے جدید رنگوں کو بین الاقوامی سطح پر متعارف کرانے کیلئے فلم کے گیتوں کو نئے انداز میں عکس بند کیا ہے ۔ انہوں نے کہا کہ فلم میں مزید دلچسپی اورکمرشل مصالحہ کے لئے فلم کا آخری سپیل لندن میں شوٹ کیا جائے گا جس کی تیاریاں جاری ہیں جس میں مجھ سمیت محب مرزا، عظمیٰ علی خان اور حمائمہ ملک لندن جائیں گے ان فنکاروں کے دیگر شیڈول کے بعد لند ن میں فائنل رائونڈ آئندہ ماہ شو ٹ کرنے کا فیصلہ کیا جائیگا۔
