نیشنل ایکشن پلان پر مکمل عملدرآمد نہ ہونے پر وزیر داخلہ سے جواب طلب کیا جائے :سینئر وزیر سندھ
کراچی (یس اُردو) ایک نثار نے دل کی بھڑاس نکالی تو دوسرے نثار نے بھی نکالا خوب غصہ اور وزیر داخلہ سے باقاعدہ میڈیکل سرٹیفکیٹ طلب کرلیا ۔ ایک نثار پر دوسرے نثار کے ہوئے جوابی وار ، اسے کہتے ہیں شکوہ جواب شکوہ ۔ چودھری نثار نے اسلام آباد میں میڈیا کے سامنے سندھ حکومت اور خورشید شاہ کو تنقید کا نشانہ بنایا تو کراچی میں صوبائی نثار کھوڑو نے بھی ماحول خوب گرمایا ، کہتے ہیں کہ جب بھی کوئی واقعہ ہوتا ہے چوھردی نثار چھپ جاتے ہیں ۔ اگر وہ بیمار تھے تو پہلے میڈیکل سرٹیفکیٹ دکھائیں ۔ سینئر صوبائی وزیر کا کہنا تھا کہ نیشنل ایکشن پلان پر مکمل طور پر عملدر آمد نہ ہونے پر چودھری نثار سے جواب طلب کیا جائے ، وہ اپنی ذمہ داری نہیں نبھا سکتے تو دوسروں پر الزامات کیوں لگا ر ہے ہیں ۔ نثار کھوڑو نے کہا کہ وزیر داخلہ سندھ آنے سے گھبرا رہے ہیں ، وہ یہاں آکر لوگوں کی باتیں سنیں تو انہیں حقیقت معلوم ہوجائے گی ۔
