پیپلز پارٹی کے چیئرمین بلاول بھٹو نے بھی انٹرا پارٹی انتخابات کا عندیہ دیدیا، کہتے ہیں پارٹی میں مختلف عہدوں کے لئے نامزدگیوں کا کلچر ختم ہونا چاہئے۔
اسلام آباد: (یس اُردو) خیبر پختونخوا کے سینئر پارٹی رہنماؤں سے ملاقات میں بلاول بھٹو کا کہنا تھا کہ ایک خاص وقت کے اندر پیپلز پارٹی میں انٹرا پارٹی انتخابات ہونے چاہیں۔ انہوں نے خیبر پختونخوا پارٹی کو ہدایت کی کہ وہ اس ضمن میں کارکنوں کو متحرک کریں۔ بلاول بھٹو نے ہدایت کی کہ پہلے مرحلے پر کے پی کے کچھ اضلاع میں پارٹی کے اندر انتخابات کروائے جائیں گے اور اس کے بعد ملک بھر میں پارٹی کے اندر تنظیمی انتخابات ہوں گے۔ بلاول بھٹو کا کہنا تھا کہ وقت تیزی سے گزر رہا ہے ہم آ ئندہ عام انتخابات کی طرف بڑھ رہے ہیں اور آئندہ عام انتخابات میں پارٹی کو منتخب عہدیداروں کے ساتھ جانا چاہئے۔
