کھاریاں(نیئر صدیقی سے)کھاریاں میونسپل کمیٹی کے 11میں سے 9ممبران نے اپنے عہدے کا حلف اٹھا لیا۔ 2ممبران کے نوٹیفکیشن جاری نہ ہو سکے۔ڈی ایچ او ڈاکٹر عابد غوری نے نومنتخب ممبران سے حلف لیا۔ تفصیلات کے مطابق کھاریاں میونسپل کمیٹی کی گیارہ وارڈز کے منتخب کونسلرز میں سے نو نے اپنے عہدے کا حلف اٹھا لیا ۔ ڈسٹرکٹ ہیلتھ آفیسر /ریٹرننگ آفیسر ڈاکٹر عابد غوری نے کونسلروں سے حلف لیا۔ حلف اٹھانے والوں میں حاجی جاوید اقبال ملک، لال خان گوندل، خان محمد اسلم، ظفر مجید بٹ، ملک اختر اعوان ، عبدالقیوم بھٹی ، شیخ محمد حفیظ، چوہدری ثاقب بشیر ایڈووکیٹ اور چوہدری وقاص مجید شامل ہیں ۔ جبکہ پی ٹی آئی کے نومنتخب کونسلر اور امیدوار برائے چیئرمین چوہدری اسفند یار ولی اور پی ٹی آئی ہی کے چوہدری عرفان احمد چھپر کی کامیابی کا تاحال نوٹس جاری نہیں ہو سکا۔ یاد رہے کہ مذکورہ دونوں امیدواروں پر دوہری شہریت کے حوالے سے رٹ پٹیشن دائر کی گئی تھی جس کے بعد چوہدری اسفند یار ولی کے خلاف رٹ ہائی کورٹ سے خارج ہو چکی ہے جبکہ چوہدری عرفان احمد چھپر کے حوالے سے 18جنوری کو آنے والے فیصلے کے بعد نوٹیفکیشن جاری کیا جائے گا۔
