زیورخ……ارجنٹائن کے اسٹار فٹ بالرلیونل میسی فیفا پلیئر آف دی ایئر کا ایوارڈ لے اُڑے، اس دوڑ میں اُنہوں نے کرسٹیانو رونالڈ اور نیمار کو پیچھے چھوڑ دیا۔
سال 2015 کا بہترین فٹ بالر کون ہوگا، یہ جاننے کے لیے تقریب زیورخ میں ہوئی جہاں فیفا مینز پلیئر آف دی ایئر ایوارڈ کے علاوہ مزید چار ایوارڈز بھی دیئے جانے تھے۔مینز کیٹگری میں دُنیائے فٹ بال کے تین نامور کھلاڑیوں ارجنٹائن کے میسی، پرتگال کے کرسٹیانو رونالڈو اور برازیل کے نیمار کے درمیان مقابلہ تھا، رونالڈو مسلسل دو برس سے یہ ایوارڈ جیت رہے تھے لیکن اس مرتبہ ایوارڈ کی دوڑ میں شامل میسی نے اُن سے یہ اعزاز ہتھیالیا، میسی مجموعی طور پر پانچویں مرتبہ یہ اعزاز جیتنے میں کامیاب ہوئےہیں۔امریکا کی کارلی لائیڈ ویمنز پلیئر آف دی ایئر ایوارڈ جیتنے میں کامیاب رہیں، بہترین ویمن کوچ کا اعزاز امریکا کی جل ایلس کے حصےمیں آیا۔بہترین مینز کوچ کا اعزاز لوئیس اینرک نے جیتا، اس کے علاوہ سال کا بہترین گول کرنے کا اعزاز وینڈل لیرا کو دیا گیا۔
