آل پاکستان مسلم لیگ کے مرکزی رہنما احمد رضا قصوری نے کہا ہے کہ انہیں پارٹی سے کوئی نہیں نکال سکتا، ڈاکٹر امجد آل پاکستان مسلم لیگ کے خود ساختہ سیکرٹری جنرل ہیں اور کسی اور کے ایجنڈے پر پارٹی میں مداخلت کر رہےہیں۔
اسلام آباد: (یس اُردو) دنیا نیوز سے بات چیت میں احمد رضا قصوری نے کہا کہ وہ اپنی ذات میں تنظیم ہیں اور انہیں پارٹی سے کوئی نہیں نکال سکتا۔ وہ خود آل پاکستان مسلم لیگ ہیں اور پارٹی سے نکالنے کا اعلامیہ جعلی ہے جس پر پارٹی کے صدر، جنرل پرویز مشرف کے دستخط تک نہیں ہیں۔ انہوں نے کہا کہ وہ جنرل مشرف کے سب سے بڑے حمایتی ہیں اور ان کے وکیل ہیں۔ ان کا کہنا تھا کہ پارٹی کے اندر کچھ لوگوں کو ان کی مقبولیت کھٹک رہی ہے اور پارٹی کے خود ساختہ سیکرٹری جنرل ڈاکٹر امجد کسی اور کے ایجنڈے پر پارٹی میں مداخلت کر رہے ہیں۔ انہوں نے کہا کہ ڈاکٹر امجد کے پارٹی مخالفین کے ساتھ کاروباری مراسم ہیں۔
