گجرات، فرانس (اشفاق چودھری) پاکستان مسلم لیگ (ق) گجرات کے نوجوان رہنما اور امیدوار چیئرمین یو نین کونسل 4 چودھری حسنین اصغر تیل والا نے کہا ہے کہ بلدیاتی انتخابات میں مخالفوں کا صفایا کر دیں گے۔ کارکن متحد ہو کر گلی گلی، کوچے کوچے پھیل جائیں اور دل و جان سے کام کریں تو کوئی وجہ نہیں کہ کامیابی مسلم لیگیوں کا مقدر نہ بنے۔
وہ یو نین کونسل 4 میں اپنے دفتر میں بلدیاتی انتخابات سے متعلق خصوصی تربیتی نشست سے خطاب کر رہے تھے جس میں یو نین کونسل 4 کے مسلم لیگی کارکن شریک تھے۔ انہوں نے کہا کہ مسلم لیگ (ق ) نے دن رات کام کر کے ملک اور قوم کو مثالی ترقی اور خودداری کی راہ پر ڈال دیا تھا ۔ ہم نے تعصب اور انتقام کی سیاست کو ہمیشہ کے لئے دفن کر دیا ہے اس لئے ملک کے عوام مسلم لیگ کو اپنا نجات دہندہ سمجھتے ہیں اور چاہتے ہیں کہ بلدیاتی انتخابات میں مسلم لیگ (ق) کو کامیاب بنائیں۔ مسلم لیگی کارکن میدان عمل میں نکلیں پارٹی ویڑن اور ایجنڈہ گھر گھر پہنچائیں تاکہ لوگ ہمارے منشور سے آگاہ ہو سکیں۔
انہوں نے مزید کہا کہ پنجاب حکومت نے مسلم لیگ (ق) کا راستہ روکنے کے لئے بلدیاتی انتخابات میں دھاندلی کا پیشگی منصوبہ بنا رکھا ہے جسے ہم اپنے سیاسی اتحاد سے ناکام بنا دیں گے۔ انہوں نے کارکنوں کو ہدایت کی کہ وہ پولنگ سے پہلے، پولنگ کے دوران اور پولنگ کی تکمیل پر تمام انتخابی عمل پر کڑی نگاہ رکھیں اور کسی قسم کی بھی بے قاعدگی اور انتخابی بے ضابطگی کا ریکارڈ بنائیں اور تمام ثبوت مسلم لیگ (ق) کے مرکزی کنٹرول روم کو پہنچائیں جو جلد قائم کر دیا جائے گا۔
