اسلام آباد : وزیراعظم نواز شریف کی زیر صدارت سیکورٹی کے حوالے سے اہم اجلاس آج ہو گا، بڈھ بیر سانحہ پر بریفنگ، افغانستان سے افغان دہشتگردوں کے حملے کا معاملہ اٹھانے سے متعلق امور پر بات چیت ہو گی۔
وزیراعظم نواز شریف نے ملکی سیکورٹی کے حوالے سے اہم اجلاس آج طلب کر رکھا ہے، ذرائع کے مطابق وفاقی وزراء خواجہ آصف، چودھری نثار، مشیر برائے قومی سلامتی سرتاج عزیز، آرمی چیف جنرل راحیل شریف کی اجلاس میں شرکت متوقع ہے۔
ڈی جی آئی ایس آئی لیفٹیننٹ جنرل رضوان اختر، ڈی جی ایم آئی میجر جنرل سرفراز ستار اور ڈی جی ملٹری آپریشنز کے بھی اجلاس میں شرکت کا امکان ہے۔
ذرائع کا کہنا ہے کہ سیکورٹی حکام پشاور واقعے پر اجلاس کو بریفنگ دیں گے ، بڈھ بیر ایئر فورس کیمپ پر حملے کا معاملہ افغانستان کے ساتھ اٹھانے اور افغان حکومت کے ساتھ دہشتگردی کے خلاف حکمت عملی پر بھی بات ہوگی۔
اجلاس میں فیصلہ کیا جائے گا کہ پشاور حملے میں افغان دہشتگردوں کے ملوث ہونے کے ثبوت دے کر کس کو افغانستان بھیجا جائے تاکہ افغان قیادت سے افغانستان میں موجود دہشت گردوں کے خلاف موثر کارروائی کا مطالبہ کیا جا سکے۔
