ممبئی: بالی ووڈ میں دبنگ گرل کے نام سے مشہور اداکارہ سوناکشی سنہا نے اداکاروں کو پیچیدہ شخصیت کا مالک قرار دے دیا۔
بالی ووڈ فلم’’دبنگ‘‘ سے اپنے فلمی کیرئیر کا آغاز کرنے والی اداکارہ سوناکشی سنہا کے کئی اداکاروں سے معاشقے کی خبریں میڈیا کی زینت بنیں جب کہ سب سے زیادہ معاشقے کی افواہیں اداکار ارجن کپور کے حوالے سے سامنے آتی رہی ہیں جس کی دونوں اداکاروں نے تردید کی ہے تاہم اپنے ایک انٹرویو میں دبنگ گرل نے پہلی بار اپنی پسند اور نا پسند کا کھل کا اظہار کیا ہے۔
بالی ووڈ کی دبنگ گرل سوناکشی سنہا کا کہنا تھا کہ ارجن کپور کے ساتھ فلم میں ایک ساتھ کام کیا جس کے بعد معاشقے کی افواہیں پھیل گئیں جس میں کوئی صداقت نہیں ہے۔ ان کا کہنا تھاکہ اداکار پیچیدہ شخصیت کے مالک ہوتے ہیں جنہیں سمجھنا مشکل ہوتا ہے جب کہ میں سادہ سی لڑکی ہوں اور اپنی زندگی میں سیدھا سادہ انسان چاہتی ہوں۔
واضح رہے کہ بالی ووڈ اداکارہ سوناکشی سنہا نے 2010 میں فلم ’’دبنگ‘‘ سے فنی کیرئیر کا آغاز کیا جب کہ آج کل اپنی فلم ’’اکیرہ‘‘ کی شوٹنگ میں مصروف ہیں۔
