اسلام آباد : وزیراعظم نواز شریف نے جوڈیشل کمیشن کی رپورٹ پر قانونی ماہرین کا مشاورتی اجلاس طلب کرلیا جس میں رپورٹ منظرعام پر لانے یا نہ لانے کے حوالے سے غور کیا جائے گا جب کہ ذرائع کے مطابق کمیشن کی رپورٹ وزارت قانون کی ویب سائٹ پر جاری کی جائے گی۔
جوڈیشل کمیشن کی انتخابات میں دھاندلی سے متعلق رپورٹ وزیراعظم آفس کو موصول ہوگئی جس پر قانونی ماہرین سے مشاورت کے لئے وزیراعظم نے اہم اجلاس طلب کرلیا۔
ذرائع کے مطابق اجلاس میں بیرسٹرظفراللہ، اٹارنی جنرل سلمان اسلم بٹ اورمعاون خصوصی امورقانون اوشتراوصاف شرکت کریں گے جب کہ اس دوران جوڈیشل کمیشن کی رپورٹ میں اٹھائے گئے آئینی اورقانونی پہلوؤں پرغورکیا جائے گا۔
ذرائع کا کہنا ہے کہ جوڈیشل کمیشن کی رپورٹ وزارت قانون کی ویب سائٹ پر عام کی جائے گی جب کہ اس حوالے سے وزیراعظم نواز شریف کا قوم سے خطاب بھی متوقع ہے اور کسی وزیرکی جانب سے پریس کانفرنس کے دوران بھی رپورٹ کے مندرجات کو جاری کئے جانے کا امکان ہے۔
واضح رہے کہ وزارت قانون کے ایک اہلکارنے گزشتہ روز دعویٰ کیا تھا کہ 2013 کے عام انتخابات میں مبینہ دھاندلی کی تحقیقات کرنے والے عدالتی کمیشن نے تحریک انصاف کے دھاندلی سے متعلق تمام الزامات مسترد کردیے ہیں اوراس حوالے سے 300 صفحات پر مشتمل رپورٹ جاری کردی جس میں کہا گیا ہے کہ انتخابات میں بدانتظامی تو ضرور ہوئی ہے لیکن اسے منظم دھاندلی قرار نہیں دیا جاسکتا۔
