لاہور : شام چوراسی گھرانے کے معروف کلاسیک گائیک استاد سلامت علی خان کی 14ویں برسی منائی گئی۔
پاکستان کے معروف گائیک اور شام چوراسی گھرانے کے نامور گائیک استاد سلامت علی خان 12دسمبر 1934ء کو شام چوراسی ضلع ہوشیار پور میں پیدا ہوئے۔ انھوں نے اپنے بڑے بھائی استاد نزاکت علی خاں کے ساتھ ملکر اپنے والد استاد ولایت علی خاں سے موسیقی کی تربیت حاصل کی۔
استاد سلامت علی خاں نے اپنے بڑے بھائی استاد نزاکت علی خان کے ساتھ پہلی کلاسیک پرفارمنس سے شائقین کے دل موہ لیے۔ انھیں حکومت پاکستان کی جانب سے تمغہ امتیاز سے بھی نوازا گیا۔ انھوں نے اپنے فرزند استاد شرافت علی خاں پر بے حد محنت کی اور دوسرے بیٹے شفقت علی خاں کی صورت میں نامور گلوکار تخلیق کرنے میں کامیاب ہوگئے۔
کافی اور ٹھمری پر مہارت رکھنے والے گائیک کو اپنے گھرانے میں حضرت خواجہ غلام فرید کی ملتانی کافی کو نیا کلاسیکی انگ دینے کا شرف بھی حاصل ہے۔ استاد سلامت علی خان کو پنج پٹیہ گلوکار کے لقب سے بھی نوازا گیا۔ استاد سلامت علی خان11جولائی 2001ء کو خالق حقیقی سے جا ملے۔
