کراچی (جیوڈیسک) پیپلز پارٹی کے بانی اور سابق وزیراعظم ذوالفقار علی بھٹو کی برسی آج منائی جائے گی اور اس حوالے سے گڑھی خدا بخش میں مرکزی جلسہ موسم کی خرابی کے باعث منسوخ کردیا گیا جب کہ صوبے میں آج عام تعطیل ہے۔
ترجمان وزیراعلی ہاؤس کا کہنا ہے کہ سابق وزیراعظم ذوالفقار علی بھٹو کی 36ویں برسی کے موقع پر آج صوبے بھر میں عام تعطیل ہوگی جب کہ گڑھی خدا بخش میں پیپلز پارٹی کے بانی کے ایصال ثواب کے لئے قرآن خوانی ہوگی جس میں شرکت کے لئے ملک بھر سے کارکنان آنا شروع ہوگئے ہیں۔ پیپلزپارٹی کے مرکزی رہنماؤں کے علاوہ وزیر اعلی سندھ سید قائم علی شاہ لاڑکانہ پہنچ گئے۔
دوسری جانب پیپلزپارٹی کے سیکرٹری اطلاعات وقارمہدی کا کہنا ہے شدید بارشوں اور موسم کی خرابی کے باعث گڑھی خدا بخش میں ہونے والا جلسہ منسوخ کردیا گیا ہے جب کہ برسی کی تقریبات محدود پیمانے پر نوڈیرو ہاؤس میں ہوں گی جس سے پارٹی کے کو چیئرمین آصف علی زرداری اور دیگر مرکزی رہنما خطاب کریں گے۔
انہوں نے کہا کہ لاڑکانہ، سکھر، بے نظیرآباد اور دادو کے کارکن برسی کی تقریبات میں شرکت کریں گے جب کہ کراچی، حیدرآباد اور میرپورخاص ڈویژن کے رہنماؤں کو قافلے گڑھی خدا بخش نہ لانے کی ہدایت کی گئی ہے۔
