اسلام آباد (جیوڈیسک) چیئرمین تحریک انصاف عمران خان نے کہا ہے کہ آزاد کشمیر کے ضمنی انتخابات سے تحریک انصاف کے امیدوار کی جیت سے ثابت ہو گیا کہ اب آزاد کشمیر کے عوام بھی مسلم لیگ ن، پیپلز پارٹی سے جان چھڑانا چاہتے ہیں، کراچی میں ایم کیو ایم کے لوگ بھی انتخابات میں تحریک انصاف کو ووٹ دیں گے۔
انھوں نے کہاکہ اسلام آباد میں 126 دن کے دھرنے نے نئے پاکستان کا پیغام گھر گھر پہنچا دیا، خیبرپختونخوا کے بعد اب آزاد کشمیر کی عوام نے بھی میرپور کے ضمنی انتخاب میں تحریک انصاف کے امیدوار کو جتوا کر ثابت کر دیا کہ وہ اب آزاد کشمیرمیں تبدیلی چاہیتے ہیں، آزاد کشمیرمیں بھی تبدیلی آگئی ہے۔
کراچی کے عوام بھی تبدیلی کیلیے تحریک انصاف کو ووٹ دیں گے، کراچی میں آصف زرداری ایم کیو ایم کے الطاف حسین کے ساتھ دکھ کا اظہار کر رہے ہیں لیکن ایم کیو ایم کے کارکن اب اپنے رہنماؤں سے متنفر ہو گئے ہیں اور آئندہ انتخابات میں وہ تحریک انصاف کا ساتھ دیں گے۔
