اسلام آباد (جیوڈیسک) پاکستان نے کہا ہے کہ کشمیری عوام مسئلہ کشمیر کے اہم فریق ہیں، مسئلہ کا حل کشمیری عوام کی امنگوں کے مطابق ہونا چاہیے۔
بھارتی وزارت خارجہ کی جانب سے کشمیری عوام کے حوالے سے دیے گئے بیان پر منگل کو ردعمل ظاہر کرتے ہوئے ترجمان دفترخارجہ تسنیم اسلم نے کہاکہ پاکستان کا شروع سے ہی یہی موقف رہا ہے کہ علاقائی سلامتی،امن ،اقتصادی ترقی اور جنوبی ایشیائی عوام کی خوشحالی کیلیے پاکستان اور بھارت کے درمیان مذاکرات اہم اور ضروری ہیں۔
پاکستان کااس بات پر پختہ یقین ہے کہ مسئلہ کشمیر کا حتمی حل کشمیری عوام کی امنگوں کی روشنی میں اقوام متحدہ کے زیراہتمام آزاد اور غیرجانبدارانہ استصواب رائے کے ذریعے ہونا چاہیے۔
وہ استصواب رائے جس کا ذکر اقوام متحدہ ،سلامتی کونسل کی قراردادوں میں درج ہے۔کشمیری مسئلہ کشمیر کے اہم فریق ہیں اور انکوحق خودارادیت دینا ہو گا، ترجمان دفترخارجہ نے کہا کہ پاکستان بھارت کیساتھ نتیجہ خیز مذاکرات کے عزم پرکاربندہے،ہم کشمیر سمیت تمام تنازعات کاحل مذاکرات کے ذریعے چاہتے ہیں۔
