ممبئی (یس ڈیسک) اداکارہ ہما قریشی جو اگلے ماہ شائقین فلم کو شدت بھری اور بدلے سے بھرپور ڈرامہ فلم بدلہ پورمیں نظر آئیں گی۔
ہما نے کہا ہے کہ یہ میرے لیے ایک خاص فلم ہے کیونکہ مجھے اپنے پسندیدہ ڈائریکٹر سری رام رگھوان کے ساتھ کام کرنے کا موقع ملا ہے، جنھوں نے مجھے اس مشکل کردار سے آرام دہ زون سے نکال باہر کیا ہے۔ پیر کے روز ایک میگزین کے سرورق کی رونمائی کے موقع پر ہما قریشی نے اس فلم میں اپنے کردار سے متعلق بات کی جس میں اداکار ورون دھون بھی مرکزی کردار میں ہیں۔
ہما قریشی نے بتایا کہ فلم بدلہ پور میں میرا کردار جھملی کے نام سے ہے اور یہ میرے لیے ایک خاص فلم ہے کیونکہ میں اپنے پسندیدہ ڈائریکٹر کے ساتھ کام کر رہی ہوں ، میں ان کی بہت بڑی مداح ہوں اور اس وقت سے ہوں جب میں نے ان کی فلم اک حسینہ تھی اور جونی غدار دیکھی تھی تب سے میری خواہش تھی کہ میں ان کے ساتھ کام کروں،،۔
اپنے کردار سے متعلق مزید بات کرتے ہوئے ہما قریشی نے بتایا کہ میں صرف اتنا ہی کہوں گی کہ سری رام (ڈائریکٹر ) واقعی مجھے اس فلم میں سخت کردار کی بدولت آرام دہ زندگی سے باہر لے آئے ہیں، میرے خیال میں جھمیلی ایسا کردار ہے جو میں نے صرف ان ہی کے لیے کیا ہے، میں سوچ بھی نہیں سکتی تھی کہ میں اتنے مشکل کردار میں خود کو ڈھال سکوں گی۔
ہما قریشی نے بتایا کہ شائقین فلم حقیقت میں اس چیز کو پسند کریں گے کہ کیسے ہم فلم میں مشکل کام کرتے ہیں۔ فلم بدلہ پور میں ہما قریشی، ورون دھون کے علاوہ اداکار نوازالدین صدیقی اور دیویا دتا بھی مرکزی کرداروں میں شامل ہیں جب کہ یہ فلم 20 فروری کو ریلیز کی جائے گی۔
ہما قریشی اس سے پہلے مشہور فلموں گینگز آف وسے پور، لو شو تے چکن کھرانہ ، اک تھی ڈائن، ڈی ڈے ، اور نصیرالدین شاہ، مادھوری ڈکشٹ کے ساتھ کلاسیکل فلم، ڈیڑھ عشقیہ، میں بھی اداکاری کے جوہر دکھا چکی ہیں جب کہ ہما کو یقین ہے کہ بدلہ پور میں ان کا کردار شائقین کو ایک نئے انداز سے متعارف کروائے گا۔
دریں اثنا ہما قریشی نے فلمی مصروفیات میں سے شاپنگ کے لیے وقت نکال لیا اور دبئی میں دو روز شاپنگ کی۔ اداکارہ کا کہنا ہے کہ انھوں نے بے حد انجوائے کیا۔ انھوں نے اپنی چیزوں کے ساتھ ڈیکوریشن کی چیزیں اور اہلخانہ کے لیے تحائف بھی خریدے۔
