نائب وزیراعظم اور وزیر خارجہ اسحاق ڈار نے اتوار کے روز دفتر خارجہ میں چین کے سفیر جیانگ زیڈونگ سے ملاقات کی۔ ملاقات کے دوران دونوں فریقوں نے خطے میں دیرپا امن اور استحکام کے لیے مکالمے اور سفارت کاری کی اہمیت پر زور دیا۔
دوطرفہ شراکت داری کا جائزہ
ملاقات میں پاک چین ہمہ موسمی اسٹریٹجک کوآپریٹو شراکت داری کی پیش رفت کا جائزہ لیا گیا۔ دونوں فریقوں نے دوطرفہ تعلقات کو مزید مضبوط بنانے کے طریقوں پر تبادلہ خیال کیا۔
سی پیک اور اقتصادی تعاون پر اطمینان
اسحاق ڈار نے چین پاکستان اقتصادی راہداری یعنی سی پیک، علاقائی رابطہ کاری، تجارت اور سرمایہ کاری کے شعبوں میں دونوں ممالک کے درمیان تعاون پر اطمینان کا اظہار کیا۔ ملاقات میں زرعی جدید کاری میں تعاون اور عوامی سطح پر رابطوں کو فروغ دینے کی کوششوں کا بھی جائزہ لیا گیا۔
اعلیٰ سطحی رابطوں پر زور
نائب وزیراعظم نے پاکستان اور چین کے تعلقات کو مزید مستحکم کرنے کے لیے اعلیٰ سطحی رابطوں کو برقرار رکھنے کی اہمیت پر زور دیا۔ دونوں فریقوں نے نئے دور میں چین پاکستان مشترکہ مستقبل کی کمیونٹی کو آگے بڑھانے کے اپنے عزم کا اعادہ کیا۔
