اسلام آباد(ایس ایم حسنین) روس میں تیار کی گئی کورونا ویکسین اسپوٹنک 5 کو پاکستان میں رجسٹرڈ کرانے کیلئے ماسکو حکام نے وزارت خارجہ سے رابطہ کرلیا۔ روس نے پاکستان کو اسپوٹنک 5 فروخت کی پہلی پیشکش 30 نومبر کو کی تھی۔روس نے پاکستان میں اپنی تیار کردہ کورونا ویکسین اسپوٹنک 5 کی رجسٹریشن کے لیے حکام سے تفصیلات مانگی ہیں۔ وزارت خارجہ کے مطابق روس نے اسپوٹنک 5 ویکسین کی پاکستان میں رجسٹریشن میں دلچسپی کا اظہار کیا ہے۔ انہوں نے بتایا کہ روسی ڈائریکٹ انوسمنٹ فنڈ کے سربراہ نے وزیراعظم عمران خان کے معاون خصوصی صحت ڈاکٹر فیصل سلطان کو مراسلے میں ویکسین سے متعلق معلومات بھی فراہم کیں۔ مراسلے میں اس امر پر زور دیا گیا کہ پاکستان اسپوٹنک 5 ویکسین کے اولین بیچ کی ڈیمانڈ سے آگاہ کرے۔ اس حوالے سے ڈائریکٹ انوسمنٹ فنڈ کے سربراہ کیرل دیمیتروف نے کہا کہ روسی ساختہ ویکسین دنیا کی اولین رجسٹرڈ کورونا ویکسین ہے۔ مراسلے میں روسی ادارے کے سربراہ نے کہا کہ اسپوٹنک 5 ویکسین ہنگامی استعمال سرٹیفیکیٹ کی حامل ہے اور کورونا کے خلاف ویکسین 91.4 فیصد موثر ہے۔ انہوں نے کہا کہ اسپوٹنک 5 فروری 2021 میں عوامی سطح پر دستیاب ہو گی جبکہ عالمی مارکیٹ میں ویکسین کی خوراک 10 ڈالر سے کم ہو گی۔ ان کا کہنا تھا کہ روس کی تیار کردہ اسپوٹنک 5 کو دیگر ویکسین کے مقابلے میں زخیرہ کرنا آسان اور منفی 2 تا 8 درجہ حرارت پر رکھی جا سکتی ہے۔ کیرل دیمیتروف نے دعویٰ کیا کہ اسپوٹنک 5 دیگر ویکسینز کے مقابلے میں سستی ہے۔ واضح رہے کہ روس کی اسپوٹنک 5 ویکسین کو اگست 2020 میں رجسٹر کیا گیا تھا اور محدود استعمال کا آغاز گزشتہ نومبر میں ہوا تھا۔ روسی صدر ولادمیر پیوٹن گزشتہ برس اگست میں کہا تھا کہ روس دنیا کا پہلا ملک بن گیا جس نے دو مہینے سے بھی کم عرصے میں انسانوں پر ٹرائل کے بعد کورونا وائرس کی ویکسین کے استعمال کی باقاعدہ منظوری دے دی
انہوں نے کہا تھا کہ اس اقدام کو سائنسی صلاحیت کے ثبوت کے طور پر ماسکو نے پیش کیا۔
روسی صدر نے کہا تھا کہ یہ ویکسین ماسکو کے گمالیا انسٹی ٹیوٹ نے تیار کی اور یہ محفوظ ہے اور یہاں تک کہ اسے ان کی بیٹی کو بھی دیا گیا ہے۔
