اسلام آباد(ایس ایم حسنین) امریکی وزیرخارجہ مائیک پومپیوجوفلسطینیوں کے احتجاج کے باوجود مغربی کنارے میں گولان کی پہاڑیوں کا دورہ کرنے والے پہلے اعلیٰ امریکی سفارتکارہونے کا “اعزاز” حاصل کررہے ہیں۔ انھوں نے اس اولین دورے کو یادگار بنانے کیلئے دو اہم اعلان بھی کیے ہیں۔ مائیک پومپیو نے ٹرمپ انتظامایہ کی جانب سے اپنے اعلانات میں اس علاقے میں بننے والی مصنوعات کو “میڈ ان اسرائیل” قرار دینے اور فلسطینیوں کی اسرائیل بائیکاٹ مہم کو امریکہ یہودی مخالفت مہم سمجھنے کااعلان شامل ہے۔ مائیک پومپیو اسرائیل کے پرجوش حامی رہے ہیں اور فلسطینیوں کی حامی تنظیم بی ڈی ایس کی تحریک کو ’کینسر‘ قرار دے چکے ہیں جسے واشنگٹن بھی اسرائیل مخالف قرار دے چکا ہے۔ قریبی اتحادی اسرائیلی وزیراعظم نیتن یاہو سے ملاقات کے بعد مائیک پومپیو نے اعلان کیا تھا کہ آج مجھے گولڈن ہائیٹس جانے کا موقع ملے گا جس کو اسرائیل نے 1967 میں شام کے ساتھ چھ روزہ جنگ کے بعد حاصل کیا تھا۔ پومپیو نے اس امر کا اعلان بھی کیا کہ حکومت سے فنڈز حاصل کرنے والے کسی بھی گروپ کو اس مہم میں شریک ہونے سے روکا جائے گا۔ ابھی تک یہ واضح نہیں ہے کہ کون سے گروپ اس سے متاثر ہوں گے۔ پومپیو جو اب تک جو بائیڈن کی فتح کو تسلیم کرنے سے انکار میں صدر ٹرمپ کے حامی ہیں اب اس سوچ میں ہیں کہ عہدے کے دوران اپنے یورپ اور مشرق وسطیٰ کے دوروں میں وہ کیا کر سکتے ہیں۔
پومپیو نے نیتن یاہو کے ہمراہ مشترکہ نیوز کانفرنس میں کہا تھا کہ ’ہم ایسی تنظیموں کی نشاندہی کے لیے اقدامات کریں گے جو بی ڈی ایس سے رابطہ رکھتی ہیں اور ایسے گروپس کے لیے امریکی حمایت بھی واپس لیں گے۔‘ ان کا مزید کہنا تھا کہ ہم ان تمام اقوام کے ساتھ کھڑے ہونا چاہتے ہیں جو بی ڈی ایس کی تحریک کو ایک کینسر سمجھتے ہیں جو کہ وہ ہے۔ اسرائیل، بی ڈی ایس کو ایک سنجیدہ خطرے کے طور پر دیکھتا ہے اور 2017 میں ایسا قانون بھی پاس کیا جس کی مدد سے بی ڈی ایس سے رابطہ رکھنے والے غیرملکیوں پر اسرائیل پابندی لگا سکتا ہے۔ تنظیم کے کارکن اس الزام کی سختی سے تردید کرتے ہیں اور اس کا موازنہ معاشی تنہائی کے اس ہتھکنڈے سے کرتے ہیں جو جنوبی افریفہ میں نسلی امتیاز کے لیے کیا گیا تھا۔ پومپیو کی ان فلسطینیوں سے کوئی ملاقات طے نہیں ہے جو عشروں سے چلنے والے تنازع کے بارے میں ٹرمپ کا موقف سختی سے مسترد کر چکے ہیں اور یروشلم کو اسرائیل کا دارالحکومت تسلیم کیے جانے کے واشنگٹن کے فیصلے کو بھی۔ اس بات کی توقع بھی ہے کہ پومپیو مغربی کنارے کے مقبوضہ علاقے کا دورہ کرنے والے پہلے سفارت کار ہوں گے جہاں ایک وائن یارڈ نے ان کے نام پر اپنی شراب کا نام بھی رکھ دیا ہے۔
فلسطینیوں کی جانب سے متوقع دورے کی مذمت کی گئی ہے۔ درجنوں فلسطینیوں نے بدھ کے روز مظاہرہ بھی کیا اور انڈسٹریل زون کے بعض گارڈز پر پتھر بھی پھینکے۔
