اسلام آباد(ایس ایم حسنین)پاکستان اور افغانستان کے مابین حالیہ پارلیمانی وتجارتی وفود کے تبادلہ سے دونوں ممالک کے درماین کثیر الجہتی تعاون اورعوامی رابطوں کو فروغ حاصل ہوا ہے۔ پاکستان کا دیرینہ موقف ہے کہ افغانستان میں قیام امن خطے میں امن واستحکام کا ضامن ہے۔وزیر خارجہ شاہ محمود قریشی نے دورہ کابل کے دوران جمعرات کو وفد کے ہمراہ افغانستان کے اپنے ہم مصب محمد حنیف آتمر کے ساتھ ملاقات کی۔وزیرخارجہ شاہ محمود قریشی کے ساتھ وفد میں مشیر تجارت عبدالرزاق داؤد، سیکرٹری خارجہ سہیل محمود اور پاکستان کے نمائندہ خصوصی برائے افغانستان سفیر محمد صادق شامل تھے۔ملاقات کے دوران دو طرفہ تعلقات ، افغان امن عمل ،خطے میں امن و امان کی صورتحال سمیت باہمی دلچسپی کے مختلف امور پر تبادلہ خیال کیا گیا۔افغان وزیر خارجہ نے افغانستان آمد پر وزیر خارجہ مخدوم شاہ محمود قریشی کو خوش آمدید کہا۔وزیر خارجہ مخدوم شاہ محمود نے پرتپاک خیر مقدم پر افغان ہم منصب کا شکریہ ادا کیا اور کہا کہ پاکستان اور افغانستان کے مابین، گہرے ،دیرینہ، تہذیبی اور تاریخی برادرانہ تعلقات ہیں ۔افغان وزیر خارجہ محمد حنیف آتمر نے افغان امن عمل میں پاکستان کی مخلصانہ کاوشوں کو سراہتے ہوئے، دو طرفہ تعلقات کو مزید مستحکم بنانے کیلئے حکومت پاکستان کی جانب سے اٹھائے گئے عملی اقدامات پر وزیر خارجہ مخدوم شاہ محمود قریشی کا شکریہ ادا کیا۔مخدوم شاہ محمود قریشی نے کہا کہ افغانستان میں دیرپا اور مستقل قیام امن کیلئے، بین الافغان مذاکرات کا کامیابی سے ہمکنار ہونا ناگزیر ہے ۔اعلیٰ سطحی افغان مصالحتی کونسل کے چیرمین ڈاکٹر عبداللہ عبداللہ، گلبدین حکمت یار اور سپیکر افغان وولیسی جرگہ رحمان رحمانی سمیت اعلیٰ سطحی افغان وفود کے حالیہ دورہ ء پاکستان اور ان کے ساتھ ہونے والی سیر حاصل ملاقاتیں، پاکستان اور افغانستان کے مابین کثیر الجہتی شعبہ جات میں دو طرفہ تعاون کے فروغ کی علامت ہیں۔وزیر اعظم عمران خان شروع سے اسی موقف پر قائم ہیں کہ افغان مسئلے کو طاقت کے ذریعے حل نہیں کیا جا سکتا۔ شاہ محمود قریشی نے کہا کہ پاکستان، ہمیشہ افغانستان میں دیرپا اور مستقل قیام امن کیلئے، افغان قیادت میں، افغانوں کو قابلِ قبول مذاکرات کا حامی رہا ہے ۔خطے کا امن و استحکام، افغانستان میں قیام امن سے مشروط ہے ۔ہمیں خوشی ہے کہ آج دنیا پاکستان کے موقف کی تائید کرتے ہوئے، افغان امن عمل میں پاکستان کے مصالحانہ کردار کو سراہ رہی ہے۔انہوں نے کہا کہ ٹرانزٹ ٹریڈ اور پاک افغان ترجیحی تجارتی معاہدے دونوں ممالک کے درمیان دو طرفہ تجارت اور سرمایہ کاری کے حجم میں خاطر خواہ اضافے کا موجب ہوں گے مخدوم شاہ محمود قریشی نے کہا کہ پاکستان اور افغانستان کے مابین امن و استحکام کیلئے عملی منصوبہ کیلئے اے پی اے پی پی ایس کامیابی سے آگے بڑھ رہا ہے ۔پاکستان، افغان مہاجرین کی باوقار وطن واپسی کا متمنی ہے ۔ شاہ محمود قریشی نے کہا کہ افغان شہریوں کی سفری مشکلات کو پیش نظر رکھتے ہوئے۔ ان کی سہولت کیلئے پاکستان نے نئی ویزا پالیسی کا اجراء کیا۔پاکستان، افغانستان سمیت خطے میں امن و استحکام کیلئے اپنی مخلصانہ کاوشیں جاری رکھنے کیلئے پر عزم ہیں ۔
وزیرخارجہ شاہ محمود قریشی کی افغان ہم منصب سے ملاقات، تجارتی وفود کے تبادلہ سے ملکی اور عوامی رابطوں کو فروغ ملا
