اسلام آباد (ویب ڈیسک) وزیراعظم عمران خان نے عالمی عدالت انصاف کے فیصلے کا خیر مقدم کرتے ہوئے کہا ہے کہ عالمی عدالت انصاف کا فیصلہ قابل ستائش ہے۔ وزیراعظم عمران خان نے سماجی رابطے کی ویب سائٹ پر ٹویٹ کرتے ہوئے کہا ہے کہ کلبھوشن کو رہا نہ کرنے اور بھارت کے حوالے نہ کرنے کا فیصلہ سراہتا ہوں، کلبھوشن پاکستانی عوام کے خلاف جرائم کا مرتکب ہے، پاکستان کو قانون کے مطابق مزید کارروائی کرنی چاہیے۔ یاد رہے کہ عالمی عدالت انصاف نے پاکستان کے مؤقف کو تسلیم کرتے ہوئے کلبھوشن یادیو کو دہشت گرد قرار دے دیا ہے ، عدالت انصاف کے جج عبدالقوی احمد یوسف فیصلہ پڑھ کرسنایا ۔ عالمی عدالت انصاف کے جج کا کہنا تھا کہ کلبھوشن کئی بار اسی پاسپورٹ پر بھارت سے بیرونی ممالک کے سفر کرتا رہا جو پاسپورٹ اس سے پاکستان میں برآمد ہوا، اس نے اس پاسپورٹ پر بیرونی ممالک کے 17 سفر کیے۔فیصلے کے مطابق عالمی عدالت نے پاکستان اور بھارت دونوں کے اکثر اعتراضات کو مستر د کر دیا، بھارت نے سب سے پہلے کلبھوشن یادیو کی رہائی کی درخواست دائر کی تھی، جسے عالمی عدالت انصاف نے یکسر مسترد کر دیا ، اسی طرح پاکستان نے بھی مؤقف اختیار کیا تھا کہ کلبھوشن یادیو کو پھانسی دینے کے فیصلے کی توثیق کی جائے مگر عالمی عدالت انصاف نے اس درخواست کو بھی مسترد کر کے قرار دیا کہ کلبھوشن یادیو پاکستان کی تحویل میں ہی رہے گا مگر اسے قونصلر رسائی کا حق حاصل ہوگا ا ور ویانا کنونشن کی موجودگی میں اسے کسی صورت پھانسی نہیں دی جاسکتی ۔ جج عبد القوی کا کہنا تھا کہ ویانا کنونشن کی بھارت خلاف ورزی کر گیا ہے، عدالت نے قرار دیا کہ پاکستانی حکام کا کہنا ہے کہ بھارت ہمارے پوچھے گئے سوالات پر کوئی وضاحت یا جواب پیش کرنے میں ناکام رہا ہے، پاکستان اور بھارت ویانا کنونشن کے رکن ہیں، عالمی عدالت کو یہ مقدمہ سننے کا اختیار ہے، مقدمے کی تفصیلی شقوں کی جانب نہیں جانا چاہتے۔
