اسلام آباد(ویب ڈیسک) مسلم لیگ ن کے رہنمامشاہد اللہ نے کہاہے کہ جج ارشد ملک صاحب جتنی بھی پریس ریلیزیں دیں گے ، پھنستے چلے جائیں گے ۔نجی نیوز کے پروگرام ”نیا پاکستان “میں گفتگو کرتے ہوئے مشاہد اللہ نے کہا کہ یہ ویڈیو جج صاحب کے گھر کی ہے ، یہ کہیں اور کی نہیں ہے اور جس بندے کے ساتھ یہ ویڈیو ہے ، وہ بھی ارشد ملک کادوست ہے اور اس کا بھائی بھی ان کا دوست ہے ۔ انہوں نے کہا کہ ارشد ملک ویڈیو کی بات کریں اور اس کا فرانزک کروائیں ، اگر جعلی ہوئی تو جج صاحب کا موقف ٹھیک ہوگا لیکن اگر ٹھیک ہوئی تو پھر کیا ہوگا ؟مشاہد اللہ نے کہا کہ نواز شریف کو اقامہ میں سزا دی گئی اور ساتھ لکھا کہ کوئی کرپشن نہیں کی، پانامہ میں میں باقی چار سو سے زائد افراد کیخلاف کوئی کارروائی نہیں کی گئی جس کا مطلب یہ ہے کہ یہ انتقامی کارروائی تھی ۔ان کا کہناتھا کہ حکومت اس ویڈیو کا فرانزک آڈٹ بالکل نہیں کروائے گی کیونکہ کل سے ناصر بٹ کے کنڈکٹ پر بات ہورہی ہے ، ویڈیو کافرانزک آڈٹ کروانے پر بات نہیں ہورہی ہے ۔ جبکہ دوسری جانب ایک خبر کے مطابق وزیرخارجہ شاہ محمود قریشی نے کہا ہے کہ جج صاحب نے ویڈیو کی نفی کرکے خود ہی قلعی کھول دی، ویڈیو کا فرانزک آڈٹ کرایا جائے اورحقائق سامنے آجائیں گے، ن لیگ کی مزید ویڈیو کی بات مفروضوں پر مشتمل ہے، مریم نواز کوجلسے سے نہیں روکا، صرف جگہ تبدیل کرنے کا کہا تھا۔ انہوں نے آج ملتان میں میڈیا سے گفتگو کرتے ہوئے کہا کہ جس ویڈیو کا ذکر ہو رہا ہے جج صاحب نے اس کی نفی کردی۔ویڈیو کی قلعی جج صاحب نے کھول دی ہے۔ انہوں نے کہا کہ ویڈیو کا فرانزک آڈٹ کرایا جائے اورحقائق سامنے آجائیں گے۔ جج کے بیان کے بعد ویڈیو کی کوئی حیثیت اور اہمیت نہیں رہی۔ انہوں نے کہا کہ مریم نواز کو منڈی بہاءالدین میں جلسہ سے نہیں روکا گیا۔ مریم نواز کو سیکیورٹی وجوہات پر جلسہ کی جگہ تبدیل کرنے کا کہا گیا تھا۔دوسری جانب وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان نے کہا کہ کل ایک وارداتی ٹولہ پانامہ کیس سامنے آنے کے بعد میڈیا میں ایک نیا بیانیہ بیان کرنے میں مصروف رہا۔پانامہ کیس کے ساتھ جڑا ایک ایسا فیصلہ جس کو سپریم کورٹ کے معزز ججز دیکھ رہے تھے‘ عدالت میں اس کیس کا ٹرائل ہو رہا تھا‘ اس کیس کے فیصلے پر سیاسی پوائنٹ اسکورنگ کی جاتی رہی‘ اس کیس پر سیاسی تھیٹر لگایا گیا اور عوام کو گمراہ کیا جاتا رہا‘ مریم نواز بے بسی کا اظہار کر چکی ہے‘ دھوکہ دہی اور گمراہ کرنے کی واردات اس خاتون کے بریف کیس میں موجود تھی جو خود کو نائب صدر لکھتی ہیں۔ انہوں نے سیالکوٹ کے ایک مقامی ہوٹل میں پریس کانفرنس کرتے ہوئے کہا کہ مریم صفدر نے صدر کی موجودگی میں کل پریس کانفرنس کی۔انہوں نے یہ تاثر دے کر ایک بیانیہ عوام کے سامنے رکھا کہ جج نے ایک معزز شخص کے خلاف فیصلہ دیا۔
