اسلام آباد(نیوز ڈیسک ) سوشل میڈیا پر پاکستان مسلم لیگ ن کی نائب صدر مریم نواز کے خلاف مہم چلانے پر وینا ملک مشکل میں پڑ گئی ہیں۔نجی نیوز چینل ہم نیوز کے مطابق وینا ملک کے خلاف مسلم لیگ ن جاپان کے صدر ملک نور نے ایف آئی اے میں درخواست دائر کردی جس پرسائبر کرائم اسلام آباد کی جانب سے قانونی کارروائی شروع کر دی گئی۔درخواست گزار نے مو¿قف اپنایا ہے وینا ملک نے اپنے تصدیق شدہ ٹویٹر اکاو¿نٹ سے نواز شریف اور مریم نواز کے خلاف نازیبا الفاظ استعمال کئے ہیں۔ان کا کہنا تھا کہ اداکارہ کی جانب سے نازیبا الفاظ پر مسلم لیگ ن کے کارکنوں میں غم و غصہ پایا جاتا ہے اور ان کی دل آزاری ہوئی ہے۔مسلم لیگ ن جاپان کے صدر نے ایف آئی اے سے سائبر کرائم ایکٹ کے تحت وینا ملک کے خلاف سخت کارروائی کا مطالبہ کیا ہے۔دائر درخواست میں انہوں نے مزید کہا کہ نواز شریف اور ان کی صاحبزادی کے خلاف الزامات ٹویٹر اکاؤنٹ سے ہٹائے جائیں۔اس حوالے سے ایف آئی اے کے تفتیشی افسر نے کہا کہ مسلم لیگ ن کی جانب سے درخواست موصول ہوئی ہے جس پر قانون کے مطابق کارروائی کررہے ہیں۔خیال رہے کہ مریم نواز کی پریس کانفرنس ہو، سماجی رابطوں کی ویب سائٹ ٹوئیٹر پر جاری کیا گیا ٹویٹ ہو یا کوئی بھی بیان ، وینا ملک کی جانب سے کوئی بھی موقع ہاتھ سے خالی نہیں جانے دیا جاتا تھا، وینا ملک بھرپور انداز میں مریم نواز پر لفظی وار کرتی تھیں ، جبکہ وینا ملک کے ٹویٹس کو تحریک انصاف کے رہنماء خاص طور پر عامر لیاقت حسین ری ٹویٹ بھی کرتے تھے، تاہم مریم نواز کی جانب سے وینا ملک کو بلاک کر دیا گیا ہے، دوسری جانب وینا ملک کی لفظی جنگ سے مریم نواز ہی نہیں بلکہ ثانیہ مرزا بھی متاثر ہوئیں اور انکی دل آزاری ہوئی، ثانیہ مرزا نے بھی وینا ملک کو ٹوئٹر پر ہی جواب دینے کے بعد بلاک کر دیا ہے۔
