لاہور: پاکستانی شوبز انڈسٹری کی مشہور اور جانی پہچانی شخصیت ونیزہ احمد کی چھوٹی بہن ٹریفک حادثہ میں جان کی بازی ہار گئیں شوبز سے وابستہ شخصیات نے دکھ کی اس گھڑی میں ونیزہ احمد کے ساتھ اظہار افسوس کیا ہے ۔ تفصیلات کے مطابق ونیزہ احمد کی چھوٹی بہن ایشااحمد دو روز قبل اسلام آباد میں ایک ٹریفک ایکسینڈنٹ میں جاں بحق ہوگئی تھیں۔فیشن ڈیزانئر حسن یٰسین شہریار، اداکار عمران عباس اور زینب قیوم سمیت بہت سے افراد نے ونیزہ احمد سے افسوس کرتے ہوئے کہا ہے کہ اللہ تعالی ان کی فیملی کو یہ صدمہ برداشت کرنے کی ہمت عطا فرمائے۔سوشل میڈیا پر بہت سے دیگر افراد نے بھی ایشا کی موت پر افسوس کا اظہار کیا ہے۔ دوسری جانب ایک اور خبر کے مطابق وزیراعظم عمران خان کی طرف سے گرفتار بھارت کے پائلٹ ابھی نندن کی رہائی کے اعلان اور مذاکرات کی پیش کش کا شوبز حلقوں میں زبردست خیر مقدم کیا جا رہا ہے۔ معروف گلوکار ابرار الحق نے کہا ہے کہ وزیراعظم عمران خان نے گرفتار بھارتی پائلٹ کی رہائی کا اعلان کرکے ایک اچھی مثال قائم کی ہے، انہوں نے کہا کہ عمران خان کی طرف سے بھارت کو مذاکرات کی پیش کش بھی ایک اچھا اقدام ہے، بھارت کو اس پیش کش سے فائدہ اٹھانا چاہیے۔ شاہدہ منی نے کہا کہ وزیراعظم عمران خان نے بھارت پائلٹ کی رہائی کا اعلان کرکے لوگوں کے دل جیت لئے ہیں، انہوں نے کہا کہ بھارت پائلٹ کی بہت مہمان نوازی کی گئی جس پر اس نے شکریہ بھی ادا کیا ہے اور پاک فوج کی تعریف کی ہے۔ ریماخان نے کہا کہ عمران خان نے بھارت پائلٹ کی رہائی کا اعلان کرکے ایک اچھا پیغام دیا ہے ، اس کے جواب میں بھارت کو اچھے رویے کا مظاہرہ کرنا چاہیے ، عمران خان کی طرف سے مذاکرات کی پیش کش کا مثبت جواب دینا چاہیے۔
