اکڑو بیٹھ کر ورزش کرنے کے فائدے

اُکڑوں بیٹھ کر ورزش کرنے سے آپ کاجسم بالکل چست رہتا ہے، اس لیے کہ اس سے کولھوں، پیٹھ اور ہاتھ کی بہت اچھی ورزش ہوجاتی ہے، جسم کے سارے عضلات بھی سرگرم ہوجاتے ہیں۔
اُکڑوں بیٹھ کر کی جانے والی ورزش کو عام طور پر لوگ صرف ٹانگوں کی ورزش سمجھتے ہیں، لیکن اس سے سارا جسم متحرک ہوجاتا ہے، جس میں خاص طور پر کولھوں اور گھنٹوں پر زیادہ زور پڑتا ہے ۔ چنانچہ اس کے نتائج اچھے نکلتے ہیں۔
اس ورزش میں کافی محنت کرنی پڑتی ہے، مگر یہ ان ورزشوں کے مقابلے میں بہتر ہے، جن میں جسم کے ایک ہی حصے کو باربار حرکت دی جاتی ہے۔
اس ورزش کو نہایت احتیاط سے کرنا چاہیے، ورنہ گھنٹوں پر بہت خراب اثر پڑسکتا ہے۔ اکڑوں بیٹھ کر ورزش کرنے سے ہڈیوں کا ٹھوس پن  بڑھ جاتا ہے اور عضلات مضبوط ہوجاتے ہیں اس ورزش سے جسم کی اضافی چکنائی بھی جل جاتی ہے۔
ورزش کی ابتدا میں آپ وزن نہ اٹھائیں، البتہ جسم اس کا عادی ہوجائے تو پھر وزن کے ساتھ ورزش کرنے میں کوئی حرج نہیں۔ اگر آپ نے اس سے پہلے یہ ورزش نہیں کی ہے تو ہر قدم پر احتیاط کی ضرورت ہے۔ ورزش کرنے کے طریقے ذیل میں درج کیے جارہے ہیں۔
آپ سیدھی کھڑی ہوجائیں اور اپنی ٹانگوں کو شانوں سے زیادہ پھیلالیں۔ پھر اس طرح سے بیٹھیں، جیسے آپ کسی کرسی پر بیٹھتی ہیں (اس ورزش میں کرسی استعمال نہیں کی جائے گی )۔
اپنے ہاتھوں کو آگے کی طرف پھیلائیں، جیسے آپ نے انھیں کسی کے شانے پررکھا ہوا ۔ آپ کے کولھے گھٹنوں سے نیچے ہونے چاہییں اورنگاہ سامنے ۔
کوشش کیجیے کہ آپ کا پیٹ اندر چلاجائے۔ آپ کے جسم کا وزن ایڑیوں پر ہونا چاہیے۔ اپنی پیٹھ کو بالکل سیدھا رکھیے۔ ریڑھ کی ہڈی بھی بالکل سیدھی ہونی چاہیے۔ گھٹنے پاؤں سے آگے نکلنے ہوئے نہ ہوں۔ جب تھک جائیں تو اسی حالت میں کھڑی ہوجائیں۔
یہی ورزش وزن کے ساتھ اس طرح سے کی جاتی ہے کہ ایک ڈمبل (لوہے یالکڑی کاچھوٹا ڈنڈا، جس کے دونوں سروں پر دو گولے لگے ہوئے ہوں ) دونوں ہاتھوں سے تھام کراکڑوں حالت میں بیٹھ جائیں جب اعصاب مضبوط ہوجائیں تو آپ وزن میں اضافہ کرسکتی ہیں۔
ایک ڈمبل ، جسے آپ سہولت سے اٹھاسکتی ہوں، اٹھائیں۔ اسی ڈمبل کوسینے تک لے جائیں۔ پھر رفتہ رفتہ بیٹھ جائیں، پہلے جیسی صورت میں، یعنی کرسی بن جائیں۔ چند ثانیوں کے بعد اٹھ جائیے۔ پھر اسے دہرائیں۔
دونوں ہاتھوں میں ڈمبل تھام لیں۔ انھیں اپنے شانوں پر رکھ لیں اور پہلے کی طرح کرسی بن جائیں۔ یہ اندازاختیار کرنے سے آپ کے شانے مضبوط ہوجائیں گے۔
وزن کو شانوں پر رکھ لیں اور گھنٹوں کے بل بیٹھ جائیں۔ اس انداز کی ورزش سے آپ کی ریڑھ کی ہڈی اور پیٹھ مضبوط ہوجائے گی ۔
گھٹنوں کے بل بیٹھ کرکی جانے والی ورزش میں یہ خیال رکھیے کہ آپ کے گھٹنے پاؤں کے انگوٹھوں کی طرف ہوں۔ سینہ آگے کو ہواور سانے پیچھے کی جانب۔ آنکھیں اور چہرہ سامنے کے رخ پر ہو۔