بولی وڈ آنجھانی اداکارہ سری دیوی کو کانز فلم فیسٹیول 2018 کے دوران فلم آئکن ایوارڈ سے نوازنے کا فیصلہ کیا گیا، وہ بھارت کی پہلی خاتون سپراسٹار ہیں جنہیں فلمی دنیا کے سب سے بڑے فیسٹیول میں یہ اعزاز ملے گا۔
کانز فلم فیسٹیول میں 16 مئی کا دن دنیا بھر کی فلم انڈسٹری سے تعلق رکھنے والی خواتین کے نام کیا جارہا ہے، اس دوران بھارت سے ٹائٹن فلم آئکن ایوارڈ سری دیوی کے نام کرنے کا فیصلہ کیا گیا ہے، جہاں اداکارہ کی بہترین پرفارمنسز کی جھلکیاں شائقین کے سامنے پیش ہوں گی۔
انڈین ایکسپریس کی رپورٹ کے مطابق اداکارہ کے شوہر پروڈیوسر بونی کپور کا اس حوالے سے کہنا تھا کہ ’جھانوی، خوشی اور میں سری دیوی کو ملنے والے تمام ٹریبیوٹس کے لیے بےحد خوش اور شکر گزار ہیں، سری کی زندگی اور کام نے کئی لوگوں کے دلوں پر اثر چھوڑا، وہ لاکھوں لوگوں کے لیے مثال تھیں، وہ اپنے کام کی وجہ سے ہمیشہ زندہ رہیں گی‘۔
اس اعزاز کے لیے بھارتی حکومت کا شکریہ ادا کرتے ہوئے بونی کپور اور ان کے خاندان نے بیان جاری کیا، جس میں انہوں نے کہا کہ ’ہم بھارتی حکومت کے شکر گزار ہیں، اور ساتھ ساتھ ان تمام دوستوں اور مداحوں کا بھی شکریہ ادا کرتے ہیں جو اس وقت ہمارے ساتھ ہیں‘۔
خیال رہے کہ رواں سال سری دیوی کے انتقال کے بعد انہیں اپنی فلم ’موم‘ کے لیے پہلے نیشنل ایوارڈ سے بھی نوازا گیا۔
سری دیوی کی موت رواں برس 24 فروری کو 54 سال کی عمر میں دبئی کے ایک ہوٹل میں نہانے کے دوران ہوئی تھی، وہ اپنے شوہر کے بھتیجے کی شادی میں گئیں تھیں۔سری دیوی کی زندگی
معروف اداکارہ کا اصل نام شری اما ینگر ایاپن تھا اور انہوں نے چائلڈ آرٹسٹ کی حیثیت سے اپنے کیریئر کا آغاز کیا اور 1978 میں بالی وڈ میں ڈیبیو سے قبل تامل، تیلگو، ملیالم اور بنگالی فلموں میں اپنے فن کا لوہا منوایا۔
انہوں نے 80 اور 90 کی دہائی میں چاندنی، لمحے، جدائی، مسٹر انڈیا، گمراہ، خدا گواہ، لاڈلا سمیت کئی فلموں میں اپنی جاندار اداکاری سے شائقین کے دل جیت لیے۔
مایہ ناز بالی وڈ اسٹار نے ناصرف اپنے کیریئر کے پہلے حصے میں شاندار اداکاری کی بلکہ کیریئر کے دوسرے حصے میں انگلش ونگلش اور مام جیسی فلموں میں جاندار اداکاری سے سب کو حیران کردیا۔
فلمی دنیا کیلئے ان کی بے انتہا خدمات پر 2013 میں بھارتی حکومت نے انہیں ملک کے چوتھے بڑے شہری اعزاز ‘پدما شری’ سے نوازا تھا۔ 2013 میں بھارتی سینما کے 100 سال کی تکمیل پر آئی بی این-سی این این نے ووٹنگ کی تھی جس میں عوام نے انہیں 100 سال میں بھارت کی سب سے عظیم اداکارہ قرار دیا تھا۔ رواں سال ان کی بیٹی کرن جوہر کی فلم کے ذریعے فلمی دنیا میں قدم رکھنے والی ہیں لیکن بدقسمتی سے وہ یہ دیکھنے کیلئے اس دنیا میں موجود نہیں ہوں گی۔
