لاہور: پشاور سے تحریک انصاف کے موجودہ رکن کے پی کے اسمبلی اور پارلیمانی سیکریٹری جاوید نسیم نے اپنے ساتھیوں اور ووٹروں سمیت پی ٹی آئی چھوڑ کر مسلم لیگ(ق) میں شمولیت کا اعلان کیا ہے۔
ق لیگ کے صدر وسابق وزیراعظم چوہدری شجاعت حسین اور سینئر مرکزی رہنما وسابق نائب وزیراعظم چوہدری پرویزالٰہی نے ان کا خیرمقدم کرتے ہوئے کہا کہ ہم نے مسلم لیگ کا ایک پلیٹ فارم بنایا ہے، ن لیگ سمیت تمام جماعتوں والوں کو اس میں آنے کی دعوت ہے، ہم نے نیک نیتی سے کام کیا، کر رہے ہیں اور کرتے رہیں گے، اپنے گھر اور مسلم لیگ کے دروازے سب کے لیے کھول دیے ہیں، نئے آنے والوں کو بھی عزت و احترام ملے گا، مسلم لیگ کام اور ڈیلیور کرنے والوں کی جماعت ہے، پنجاب میں ہم نے پانچ سالہ اقتدار کے دوران عام اور غریب آدمی کے لیے جو کام کیے ن لیگ اپنے اقتدار کے 23سال میں اس طرح کا ایک کام دکھا دے۔
چوہدری شجاعت نے کہا کہ جو میں کہتا ہوں وہ کتاب میں لکھا اور سب سچ لکھا، جن کے متعلق لکھا کسی نے نہیں کہا کہ غلط لکھامیں نے دین وایمان کے مطابق تمام چیزیں ٹھیک لکھیں، لوگ کہتے ہیں کہ دروازے کھول رہے ہیں ہم نے اپنا گھر کھول رکھا ہے، نیک نیتی سے کام کر رہے ہیں اور کرتے رہیں گے، جاوید نسیم نے جس جماعت کو چھوڑا وہ حکومت میں ہے، کل پشاور سے کچھ لوگ آئے اور کہا ہمارے سے پوچھے بغیر صوبے میں صدر اور سیکریٹری نہ بنائیں۔ انھوں نے کہا جب این آر اوبنا لیا تو پھر پرویز مشرف نے مجھے بتایا، میں نے لکھے ہوئے این آراو کو صرف پڑھا اس میں 3 ہزار لوگوں کو معاف کیا گیا، میں نے صدر صاحب کو اپنے پانچ سال کا پیریڈ نکالنے کو کہا کہ ہمارا احتساب ہونے دیں، اگر ہمارے کسی بندے نے کچھ کیا ہے تو وہ عدالتوں میں پیش ہوں گے، اللہ کا شکر ہے ہمارے اوپر کوئی الزام ثابت نہیں ہوا۔ انھوں نے کہا ہم نے تحریک انصاف کی وکٹ گرا کر کوئی دشمنی نہیں کی، انتخابات میں سیاسی اتحاد وقت پر دیکھیں گے۔
پرویزالٰہی نے کہا کہ ہم نے مسلم لیگ کا ایک پلیٹ فارم بنایا ہے۔ تمام جماعتوں اور ن لیگ کو بھی اس میں آنے کی دعوت دی ہے، 2011ء میں جنوبی پنجاب صوبہ کی آواز ہم نے اٹھائی۔ انھوں نے ایک سوال پر لغاری برادران کو اپنے بچے قرار دیا اور کہا کہ یہ بچے اب بڑے ہو گئے ہیں، میں نے اپنے دور میں ترقیاتی بجٹ جنوبی پنجاب کی طرف موڑا، بطور وزیراعلیٰ ہر ہفتے جنوبی پنجاب کا دورہ کرتا تھا۔ ان کا کہنا تھا نواز شریف سے ملاقات کے لیے چلتی پھرتی شخصیت آئی لیکن اس کو سنجیدہ نہ لیں، ن لیگ کے لوگ عدلیہ کیخلاف پروپیگنڈا کر رہے ہیں، یہ عدالتوں کے اوپر حملے کر کے بھی بچتے رہے، شہباز شریف قیمے والے نان کھلانے کا اعلان اسپیکر میں کر رہے تھے، میں اس وقت اسپیکر پنجاب اسمبلی تھا۔
پرویز الٰہی نے کہا کہ پشاور سے آنے والوں کا اور ہمارا ہمیشہ ساتھ رہے گا۔ اب کے پی کے میں ق لیگ کی بہترین ٹیم ہے، دنوں میں رزلٹ سامنے آئے گا، لوگ پیسوں کے لیے لیکن ہم عزت اور عوام کی خدمت کے لیے سیاست میں آئے ہیں، نواز شریف نے ہمیں خود پارٹی سے نکالا، لوگ اب سمجھ گئے ہیں ان کے پاس دینے کے لیے عزت ہی نہیں اس لیے لوگ چھوڑ رہے ہیں، ہمارا سلوگن عام اور غریب آدمی تھا ہم کسی کو نہیں چھوڑتے، وزیر خود چھوڑ کر گئے تو انھیں کہا کہ سدا اقتدار نہیں رہتا، 10سال میں بہت سیکھا ہے
