الیکشن کمیشن نے حلقہ بندیوں کا شیڈول جاری کر دیا، عام انتخابات کیلئے حلقہ بندیوں کا عمل 15 جنوری سے شروع ہوگا جسے 28 فروری تک مکمل کر لیا جائے گا، اعتراضات 5 مارچ سے 3 اپریل تک سنے جا ئیں گے۔ ڈسٹرکٹ الیکشن کمشنرز کا کوئی عمل دخل نہیں ہو گا۔
اس حوالے سے اسلام آباد میں قومی اسمبلی کی قائمہ کمیٹی برائے پارلیمانی امور کا اجلاس ہوا جس میں ایڈیشنل سیکرٹری الیکشن کمیشن حکام وزارت پارلیمانی امور نے شرکت کی۔ اس موقع پر الیکشن کمیشن حکام نے حلقہ بندیوں سے متعلق کمیٹی کو بریفنگ دیتے ہوئے بتایا کہ حلقہ بندیوں کا عمل 45 میں مکمل کیا جائے گا۔ حلقہ بند یوں پر اعتراضات 5 مارچ سے 3 اپریل تک سنے جا ئیں گے جو 3 مئی تک نمٹائے جائیں گے۔ حلقہ بندیوں سے متعلق کمیٹیوں کی تشکیل بھی 5 جنوری تک کر لی جا ئے گی۔ حلقہ بندیوں میں ڈسٹرکٹ الیکشن کمشنرز کا کوئی عمل دخل نہیں ہو گاجسکی نگرانی الیکشن کمیشن خود کرے گا اور اس سلسلے میں اعتراضات بھی خود سنے گا جس کے بعد حلقہ بندیوں سے متعلق فیصلہ سپریم کورٹ میں چیلنج کیا جاسکے گا۔
