اسلام آباد…….وزیرداخلہ چوہدری نثار نے اپوزیشن لیڈر خورشید شاہ کے حکومت سے مک مکا کی تصدیق کردی،بولے دوسال میں اپوزیشن لیڈر نے حکومت وقت سے اہم ترین عہدے کا کیسے فائدہ اٹھایا وہ الگ کہانی ہے ۔قائد حزب اختلاف خورشید شاہ حکومت سے مراعات لیتے ہیں۔یہ بات چوہدری نثار کی جانب سے پہلے بھی سامنے آئی۔ چارسدہ واقعے کے بعد خورشید شاہ نے وزیر داخلہ کو تبدیل کرنے کا مطالبہ کیا تو ان کے دفاع کے لیے وفاقی وزیر چوہدری تنویر سامنے آئے اور کہا کہ خورشید شاہ حکومت سے مراعات لینے کے عادی ہو چکے ہیں۔ اور آج یہ بات ایک بار پھر کہی ہے چوہدری نثار نے،ساتھ ہی انہوں نے یہ بھی کہا ہے کہ حکومت اور پیپلز پارٹی کے درمیان مک مکا تھا۔ انہوں نے واضح طور پر کہا کہ وہ اسی مک مکا کا ذکر کر رہے ہیں جس کا الزام تحریک انصاف لگاتی رہی ہے۔ اب جبکہ حکومت کے ایک ذمہ دار وزیر نے اس کی تصدیق کر دی ہے تو خورشید شاہ کو واضح بیان دینا ہو گا کہ انہوں نے حکومت سے کون سی مراعات لیں؟اور اگر انہوں نے مراعات نہیں لیں تب بھی واضح طور پر بتائیں اور حکومت بھی بتائے کہ ان مراعات کے بدلے میں اس نے بھی کچھ حاصل کیا یا خورشید شاہ کو بس فری فنڈ میں مراعات دیتی رہی۔
