ہرارے : زمبابوین حکومت دورئہ پاکستان پر بورڈ سے ناراض ہوگئی، اسپورٹس اینڈ ریکریشن کمیشن کا کہنا ہے کہ زیڈ سی نے ہماری منشا کے برعکس فیصلہ کیا، سیکیورٹی خدشات کو نظر انداز کیا گیا، ٹیم کی واپسی پر ان سے وضاحت طلب کی جائے گی۔
تفصیلات کے مطابق زمبابوین کرکٹ ٹیم پاکستان پہنچ چکی جبکہ جمعے سے سیریز کا باقاعدہ آغاز ہورہا ہے، مگر بورڈ کی جانب سے ٹیم بھیجنے کا فیصلہ حکومتی ناراضی کا سبب بن چکا۔ زمبابوے کی وزارت خارجہ نے کرکٹ ٹیم کو سیکیورٹی خدشات کے باعث پاکستان کے سفر سے گریز کا مشورہ دیا،اسپورٹس اینڈ ریکریشن کمیشن (ایس آر سی) نے بھی اس ٹور سے اختلاف کیا تھا لیکن بورڈ نے پی سی بی کے ساتھ وعدے کا پاس کرتے ہوئے حکومتی ناراضی کی پروا نہیں کی۔
اس بارے میں ایس آر سی نے اپنے اعلامیہ میں کہاکہ ہم نے نہایت تشویش کے ساتھ یہ خبر سنی کہ ہماری جانب سے سیکیورٹی وجوہات کی بنا پر ٹور کو کلیئر نہ کرنے کے باوجود کرکٹ ٹیم پاکستان چلی گئی، زیڈ سی نے جو حرکت کی اسے نظر انداز کیے بغیر ہم یہ دعا اور امید کرتے ہیں کہ ہمارے سیکیورٹی خدشات سچ ثابت نہیں ہوں گے، ہماری ٹیم اس دورے میں کسی بھی قسم کی مصیبت سے محفوظ رہے گی۔
اس کے ساتھ ہم ٹیم کی پانچ میچز کی سیریز میں کامیابی کیلیے بھی دعاگو ہیں۔ ایس آر سی نے مزید کہا کہ ہم کرکٹ بورڈ سے اس فیصلے پر جواب ضرور طلب کرینگے، ہم ایک بار پھر واضح کرنا چاہتے ہیں کہ اس فیصلے میں کھلاڑیوں کی سیکیورٹی کو نظر انداز کیا گیا ہے،کوئی بھی چیز کسی انسانی زندگی سے زیادہ اہم نہیں ہوسکتی۔
