اسلام آباد (یس ڈیسک) ٹی وی ٹیکس کے بعد اب ریڈیو ٹیکس بھی لگے گا، ڈی جی ریڈیو نے موبائل فون اور گاڑیوں پر ریڈیو ٹیکس لگانے کی تجویز دے دی۔
حکومت کی جانب سے ٹی وی ٹیکس کے نام پر پہلے ہی بجلی کے بلوں پر پینتیس روپے وصول کئے جا رہے ہیں ۔ اب ریڈیو ٹیکس کی تجویز بھی سامنے آگئی۔ ڈی جی ریڈیو عمران گردیزی نے پبلک اکاؤنٹس کمیٹی کو بریفنگ دیتے ہوئے کہا کہ فیوچر پنشن پلان کے لئے سات ارب روپے درکار ہیں جبکہ آمدن صرف تینتیس کروڑ روپے ہیں۔
پاکستان ریڈیو کی آمدن بڑھانے کیلئے بزنس پلان تیار کر لیا ہے ، گاڑی اور موبائل فون رکھنے والےلوگ ریڈیو سنتے ہیں اس لئے نئی گاڑیوں کی رجسٹریشن پر چار ہزار روپے فی گاڑی ٹیکس لگانے کی تجویز ہے جبکہ موبائل فون صارفین سے بھی ٹیکس وصول کیا جائے ۔ ڈی جی ریڈیو کی تجاویز پر پبلک اکاؤنٹس کمیٹی کے اراکین کی اکثریت نے موبائل فون پر ریڈیو ٹیکس لگانے کی مخالفت کر دی۔
کمیٹی کے حکومتی جماعت سے تعلق رکھنے رکن جنید انوار چودھری کا کہنا ہے کہ موبائل فون غریب عوام بھی استعمال کرتے ہیں ۔ موبائل فون پر ٹیکس لگانے کی بجائے پی بی سی کی مارکیٹ بہتر بنائی جائے ، حکومتی جماعت سے ہی تعلق رکھنے والے دوسرے رکن رانا افضال حسین کا کہنا ہے کہ موبائل فون پر ریڈیو ٹیکس نہ لگایا جائے صرف گاڑیوں پر لگایا جائے۔
کمیٹی کے رکن محمود خان اچکزئی نے ریڈیو پاکستان حکام کی سرزنش کرتے ہوئے کہا کہ خیبر پختونخوا اور بلوچستان کی عوام غیر ملکی ریڈیو پر حالات حاضرہ کی خبریں سنتے ہیں کیا وجہ ہے کہ غیر ملکی ریڈیو سروس کے بجائے ریڈیو پاکستان نہیں سنا جاتا ؟ چیئرمین پی اے سی، سید خورشید شاہ نے ریڈیو پاکستان کی کارکردگی بہتر بنانے کیلئے مکمل رپورٹ 2 ماہ میں طلب کر لی ۔
