ممبئی (یس ڈیسک) بالی ووڈ اداکارہ روینہ ٹنڈن فشن کی دنیا پر بننے والی نئی فلم ’’شب ‘‘میں اہم کردار میں جلوہ گر ہوں گی۔
ٹائمز آف انڈیا کی جاری کردہ رپورٹ کے مطابق روینہ ٹنڈن فلم ’’شب ‘‘ میں اسٹائلش گلیمرس رول میں پردہ اسکرین پر جلوہ گر ہوںگی۔ اداکارہ ان دنوں اس فلم کی عکس بندی کے سلسلے میں بھارت کے دارالحکومت نئی دہلی میں ہیں جہاں پر وہ سخت سردی کے دوران بھی فلم کی وسیع پیمانے پر ہونے والی شوٹنگ میں حصہ لے رہی ہیں۔ اس سلسلے میں گزشتہ روز روینہ ٹنڈن نے اپنی شوٹنگ کے دوران لی گئی ایک سیلفی بھی ٹوئیٹر پر جاری کی ہے جس میں وہ کالے رنگ کے لباس میں ایک گلیمرس گرل کے انداز میں نظر آ رہی ہیں۔
’’شب ‘‘ فیشن انڈسٹری کی رنگینیوں اور مختلف انداز کے رشتوں پر بنائی جانے والی فلم ہے جس کا زیادہ تر حصہ دارالحکومت دہلی میں ہی شوٹ کیا جائے گا۔ اس فلم میں روینہ کے ساتھ آشیش بشٹ بھی مرکزی کردار میں جلوہ گر ہو رہے ہیں جو کہ فیشن ڈیزائنر وینڈل روڈرکس کے پہناوے میں ہیں جو کہ پدما شری ایوارڈ بھی حاصل کر چکے ہیں۔ اس کے علاوہ ایک اور بنگالی اداکارہ ارپیتا پال بھی فلم میں ایک اہم کردار میں جلوہ گر ہو رہی ہیں۔ بتایا جاتا ہے کہ ڈائریکٹر اونیر کی یہ نئی فلم ’’شب ‘‘ ایک شدید محبت والی لو اسٹوری پر مبنی ہے۔
مشہور ماڈل آشیش بشٹ کی یہ پہلی فلم ہوگی جب کہ اس سے قبل انھیں اداکاری کا کوئی تجربہ بھی نہیں ہے‘ آشیش کے مقابل بنگالی اداکارہ ارپیتا پال جلوہ گر ہو رہی ہیں۔ اپنی کاسٹ سے متعلق گفتگو کرتے ہوئے آشیش نے بتایا کہ ’’ میں نے اس سے پہلے 2011ء میں ڈائریکٹر اونیر کو آڈیشن دیا تھا اور اس وقت انھوں نے مجھے کہا کہ مجھ میں اداکاری کے جوہر ہیں لیکن تب تیار نہیں تھا‘ پھر میں دہلی سے ممبئی شفٹ ہوگیا تاکہ اپنے اداکاری کے خواب کی تکمیل کر سکوں۔
جب اونیر نے فلم ’’شب ‘‘ کے لیے آڈیشن شروع کیے تو مجھے شارٹ لسٹ کر لیا گیا پھر بھی مجھے اردو اور اداکاری سیکھنے میں پانچ ماہ لگے‘ اور پھر میں خوش قسمتی سے اس فلم کی مرکزی کاسٹ کے لیے منتخب کر لیا گیا‘‘ ۔ ماڈل آشیش نے بتایا کہ عامر خان اور رنبیر کپور ان کے پسندیدہ اداکار ہیں اور فلم ’’شب ‘‘ ایک نوجوان لڑکے کی محبت کی داستان ہے۔
